هەرچی جلی کوردی دانسقە هەیە لە دوکانەکەی دەست دەکەوێ

گەرناس مەعۆ – قامیشلۆ

کاسبکارێکی شاری قامیشلۆ لە رۆژئاوای کوردستان دوکانێکی تایبەت بە جلوبەرگی کوردی کردووەتەوە و هەرچی جلی دانسقە هەیە، لای دەست دەکەوێ.

لوقمان میرزا عاشقی جلی کوردیییە و بە 964ـی وت، “کارەکەم بەردەوامی شۆڕشی کوردییە، ئەمەش بۆ یەکەم جارە پێشانگایەکی لەو شێوەیە لە هەموو رۆژئاوای کوردستان و سوریا دەکرێتەوە”.

ئەو کاسبکارە هەستێکی کوردانەی جوانی هەیە، جامەدانەیەکی بەدەستەوە گرتووە و دەڵێت، “بەڕای من ئەمە تاج و ناسنامەی کوردانە”، بە کردنەوەی دوکانەکەشی هەم دەیهەوێ کەسابەت بکات، هەمیش کەلتووری رەسەنی کوردەواری بەزیندوویی بهێڵێتەوە.

مام لوقمان وەک خۆی دەڵێت، بەرگدوورە بەئەزموونەکانی هەولێر و سلێمانی جلەکانی بۆ دەدوورن و لە سنوور باج و گومرگێکی زۆر دەدات تا بەدەستی دەگات.

پێداچوونەوە؛ شۆڕش قادری