گەرماکە بەتینتر دەبێ و بلۆکە قورسەکان کرێکاری زەحمەتتر دەکەن

کاردۆست حسێن ـ هەولێر

لەگەڵ هەڵاتنی تیشکی خۆر رەنج و ماندووبوونی کرێکار دەستپێدەکات بۆ بە دەستهێنانی نانێکی حەڵاڵ، جیهاد سابر گەنجێکی 23 ساڵە، خێزاندارە و خاوەنی دوو منداڵە.

ئەو ماوەی هەشت ساڵە کاری کرێکاری دەکات و بژێوی ژیان بۆ خێزانەکەی دابین دەکات، بەڵام سەختی کارەکە وای لێ کردووە، بیر لەوە بکاتەوە کارەکەی بگۆڕێت.

جیهاد هێشتا تەمەنێکی گەنجی هەیە، بەڵام بەهۆی قورسایی کارەکەی ماندوبوون و شەکەتی زۆر بە ڕوخساریەوە دیارە و دوور لە تەمەنەکەی خۆی دەردەکەوێت، وەک خۆی دەڵێت،” کرێکاری عومرت دەبات”.

ئێستا گەرما تا 44 پلە بەرزە، ئەو وتی، کرێکاری هیچ داهاتوویەکی نییە و حەزدەکات کارەکەی بگۆڕێت، چونکە مەترسی زۆری هەیە و هیچ بیمەیەکی تەندروستی نییە جگە لە توشبوون بە ئازاری پشت و قاچ.

جیهاد شانازی بە کارەکەی دەکات، کاتێک دەبینێت کۆمەڵگا رێزێکی زۆریان لێ دەگرێت، بەڵام نەشیشاردەوە هەندێ جار بەرکەوتنیان لەگەڵ کەسانێک دەبێت، کە بە چاوێکی نزم سەیری کرێکاری دەکەن.

پێداچوونەوە: ئەحمەد مستەفا