"تەمەنیان 20 ساڵ دەبێت"
نزیکەی 500 داری باڵابەرز لە کفری قەتڵوعام کران
964+
میلاد جەلال – گەرمیان
بڕینەوەی نزیکەی 500 داری جۆری قەڵەمتۆز لە شاری کفری نیگەرانی چالاکوانان و ھاوڵاتیانی لێکەوتووەتەوە و شارەوانی قەزاکەش دەڵێت، “بەدواداچون دەکەین”.
قادر ئیسماعیل چالاکوانێکی ژینگەیی قەزای کفری بە 964ـی وت،”جێگای قبوڵ نییە بەوشێوەیە ئەو دارانە بڕاونەتەوە، ئەمە کارەساتێکی گەورەی ژینگەییە لە قەزاکە و بە بەرنامەش ئەو کارە کراوە”.
“ئەو دارانەی کە بڕاونەتەوە لە پشتێنەی سەوزایی قەزای کفرین، تەمەنیان نزیکی 20 ساڵ دەبێت و لەجۆری قەڵەمتۆزن”، قادر ئیسماعیل وای وت.
سەبارەت بەو بابەتە 964 پەیوەندیکرد بە عەلی خورشید، سەرۆکی شارەوانی قەزای کفری، ئەو وتی، “لەگەڵ پۆلیسی دارستان و دەزگا ئەمنییەکان خەریکی لێکۆڵینەوەین، بەڵکو لە رێگەی کامێراکانی چاودێرییەوە سەرەداوێکمان دەستکەوێت”.
ئاماژەی بەوەش کرد، بەشێک لەو دارانە چەند مانگێک پێش ئێستا بڕاونەتەوە و بەشێکیشیان تازە بڕاونەتەوە.
پێداچوونەوە؛ شۆڕش قادری
