دیمەنی ژمارەیەک حاجی کوردستان لە سعودیە - فۆتۆ: ئەرشیفی حەج و عومرەی كوردستان
بەهۆی شەڕی ئێران و ئێسرائیل نەیانتوانی بە فڕۆکە بگەڕێنەوە
ئەو حاجیانەی پارساڵ لە سعودیە گیریانخوارد بە 80 هەزار دینار قەرەبوو دەکرێنەوە
964+
شۆڕش قادری
ئەو حاجیانەی ساڵی رابردوو بەهۆی شەڕی نێوان ئێران و ئێسرائیل نەیانتوانی بە فڕۆکە بگەڕێنەوە، بە 80 هەزار دینار قەرەبوو دەکرێنەوە.
مانگی 6ـی ساڵی رابردوو و لەکاتی شەڕی نێوان ئێران و ئیسرائیل، بەهۆی راگرتنی گەشتە ئاسمانییەکانی ناوچەکە، ژمارەیەک حاجی كوردستان و عێراق لە سعودیە گیریانخوارد و نەیانتوانی بە فڕۆکە بگەڕێنەوە و ناچار بە پاس هاتنەوە.
کاروان ستونی وتەبێژی بەڕێوەبەرایەتی حەج و عومرەی کوردستان بە 964ـی وت، “دوای ئەو رووداوە لیژنەیەک لە دەستەی باڵای حەج و عومرەی عێراقی پێکهات و خەمڵاندنیان بۆ ئەو بڕە پارەیە کرد کە حاجیان بۆ کڕینی تیکتی فڕۆکە خەرجیان کردبوو، دواتر بڕیاری قەرەبووکردنەوەی دا و لەئێستاشدا لیژنەیەک لە بەڕێوەبەرایەتی گشتی حەج و عومرەی کوردستان سەردانی بەڕێوەبەرایەتی شار و ئیدارە سەربەخۆکانی کوردستان دەکات و بڕە پارەکەیان پێدەداتەوە”.
“هەر حاجییەک 80 هەزار دینار وەردەگرێتەوە و ژمارەی حاجییەکانیش لە هەموو عێراق و کوردستان نزیکەی سێ هەزار و 400 حاجین”، کاروان ستونی وای وت.
ئاماژەی بەوەشکرد، پڕۆسەکە لە دوێنێوە دەستیپێکردووە و بڕیارە تا هەفتەی داهاتوو هەموو ئەو حاجیانە قەرەبووەکەیان وەربگرنەوە.
کاروان ستونی دەشڵێت، کەسەکە دەبێ خۆی بچێت بڕە پارەکە وەربگرێتەوە یان ئەو کەسەی لەبری ئەو دەچێت، دەبێت بەڵگەنامەی فەرمی پێبێت.
یەکەم کاروانی حاجیان بە رێگای وشکانی بەرەو وڵاتی سعودیە بەڕێکەوتن
