کوردستان کەشی رەمەزانی گرت؛ شەقام و چێشتخانەکان چۆڵبوون و مزگەوتەکان قەرەباڵغ

ژووری هەواڵ

کوردستان کەشی رەمەزانی گرت و شەقام و دەوری چێشتخانەکان چۆڵبوون و مزگەوتەکانیش قەرەباڵغ بوون.

بەیانی و نیوەڕۆی ئەمڕۆ لە یەکەم رۆژی رەمەزاندا کەشی ناو شارەکانی خۆمان بەتەواوی گۆڕابوون، سەرشەقام و دەوری چێشتخانەکان چۆڵتر بوون و دەوری مزگەوتەکانیش قەرەباڵغ و جمەیان دەهات، یەکسەر کەشە تایبەتەکەی مانگی رەمەزان بەهەموانەوە دەرکەوت.

تیمی 964 ئەمڕۆ لە شەقامەکانی سلێمانی دەگەڕان و چەند وێنەیەکیان چرکاندووە، زۆربەی ئەو چێشتخانەنەی کراونەتەوە هەر بە دەستووری ساڵانی پێشوو پەردەیەکی سپییان لە دەوری چێشتخانەکە هەڵوەسیوە بۆ ئەوەی رێزی رۆژووەوانان بگرن و سەرنجیان بۆ خواردن و خواردنەوەکان رانەکێشن.

ئەمڕۆ لای خۆمان و زۆربەی وڵاتانی موسوڵمانی دنیا یەکەم رۆژی مانگی پیرۆزی رەمەزانە، لە ئێران و تورکیا و میسرو سوریا و ئەردەن و عومان و جەزائیرو لیبیا و تونس و چەند وڵاتێکی دیکە سبەی پێنجشەممە یەکەم رۆژە.