دیمەنی کارمەندێکی نەمامگەی پارک.وێنە.شارەوانی هەولێر
لە نەمامگەی پارکی سامی عەبدولرەحمان
112 هەزار نەمام ئامادەن بۆ باخچەکانی هەولێر
964+
توانا نەقی
نەمامگەی نمونەیی پارکی سامی عەبدولڕەحمان دەیان هەزار نەمامی ئامادەکردووە و رۆژانە لە بەخچەکان دەچێندرێن.
سەرۆکایەتی شارەوانی هەولێر بڵاویکردەوە، ئەم نەمامگەیە لە ناوخۆی پارکی سامی عەبدولڕەحمان، رۆژانە کاری تێدا دەکرێت و بە بەردەوامی بەرهەمی دار و درەخت دەڕوێنرێت و پاشان ئامادە دەکرێت بۆ بەشەکانی باخچەو دارستان بەمەبەستی چاندنیان.
ئاماژە بەوەشکراوە، ئێستا زیاتر لە 112 هەزار نەمام ئامادە کراوە و رۆژانە لە باخچەکانی ناو پاڕک دەچێندرێن، بەجۆرێک 80 هەزار لە گوڵی جۆراوجۆر و 32 هەزار داری دیکەی هەمەجۆر.
هەموو ئەو درەختانەش بەشێوەی تاقیگەیی لەلایەن ستافی نەمامگەکەوە لێکۆڵینەوە و چاودێری دەکرێن، زۆرجاریش خوێندکارانی کشتوکاڵی لەم نەمامگەیە فێرکاری لەسەر درەختەکان دەکەن و دیراسەی بەرهەمەکانی چاندنی رووەکەکان دەکەن، شارەوانی وادەڵێت.
