سەنتەرى میترۆ ئیدانەى دەکات
لە سلێمانى هەڵکوتراوەتە سەر ئۆفێسى ژمارەیەک رێکخراوى ناوخۆیى و بیانى
964+
وریا فەتاح
سەنتەرى میترۆ ئاشکراى دەکات، لەرۆژى هێرشەکەى سەر لالەزار، هێرشکراوەتە سەر بینایەک کە ئۆفێسى چەند رێکخراوێکى ناوخۆیى و بیانى تێدابووە و کەرەستەو کەلوپەلەکانیان بردوون، لەوانە فڵچەى ددان و کۆمپیوتەر و قاسەى پارە و پرێنتەر و مەکینەى دورمان و چەندین شتى تر.
ئۆفیسی پایا، دەكەوێتە گەرەكی سەرچناری شاری سلێمانی، نزیكە لە ماڵی سەرۆكی بەرەی گەل لاهور شێخ جەنگی و هۆتێل لالەزار، چەند رێكخراوێكی كەلتوری و ژینگەیی و رێكخراوێكی نێودەوڵەتی لەو تەلارە ئۆفیسییان هەیە، وەك رێكخراوی بەهرەدار بۆ پەرەپێدانی گەنجان، پایا ئەیجنسی، ئارت پلەس، پارێزەرانی ئاوی عێراق و كوردستان، رێكخراوی UPP.
رێكخراوی UPP كە بە Un Ponte Per (پردێك بۆ) ناسراوە، رێكخراوێكی قازانج نەویستی سەربەخۆی ئیتاڵییە، كاردەكات بۆ دروستكردنی پردی ئاشتی و بەهێزكردنی رێكخراوەكانی كۆمەڵگەی مەدەنی لە ناوچە جێناكۆكەكانی وەك عێراق و رۆژهەڵاتی ناوەڕاست و باكووری ئەفریقا، لە رێگەی پڕۆژەی گەشەپێدانی كۆمەڵگا، گەنجان، بەهێزكردنی ژنان، و پاڵپشتیكردنی پەنابەران.
سەنتەرى میترۆ لە زارى چەند سەرچاوەیەکى تایبەت بەخۆى بڵاوى کردەوە، بەرەبەیانی هەینی 22ـى ئابی 2025، لەكاتی شەڕە خوێناوییەكەی لالەزار لە گردی سەرچناری شاری سلێمانی، هێزی چەكدار هەڵیانكوتاوەتە سەر ئەو تەلارە كە ئۆفیسی ئەو رێكخراوە ناوخۆیی و نێودەوڵەتیانەی تێدایە.
میترۆ دەڵێت، ئەمڕۆ زانیمان هێزەكە سەرجەم كەرەستەی ناو ئۆفیسی رێكخراوەكانی بردووە، لەوانەش: قاسەی پارە بەوەی لەناویدا بووە كە پارەی پرۆژەكان بووە، چوار پرینتەری رەنگاورەنگ و رەش و سپی، تەلەفونی سەتەلایتی سورەیا، چەند سێتیێكی كۆمپیوتەر، نۆ لاپتۆپی جۆراو جۆر، سێتی داتاشۆ، سێ سێتی كامێرای سۆنی و كانون، ئامێری مای فای ئاسیا سیل و فاست لینك و ئای كیو، ئامێری ژماردنی پارە، چەند شاشەیەكی تیڤی، پاسۆرتی كارمەند، چەند هیدفۆنێك، سپیكەر، مۆبایل، و چەندین یوپی ئێس، تا دەگاتە كەرەستەی زۆر زۆر سادەییش وەك: فلچەی ددان شتن و ئامێری ریشتاشیینی كارمەندان.
ئەوشتانەى هێزە ئەمنییەکان بردویانن:
قاسەى پڕ لە پارە
پرێنتەر
مۆبایل
داتاشۆ
کامێراى وێنەگرتن
ئامێرى ماى فاى ئاسیا سێڵ و فاست لینک و ئاى کیو
ئامێرى پارەى ژماردن
تەلەفزیۆن
پاسپۆرتى خەڵک
هێدفۆن
سپیکەر
تەنانەت فڵچەى ددان شوشتن و مەکینە و موسى ریشتاشین
مەکینەى خەیاتى
جزدان
گسکى کارەبایى
ئوتوو
ئاشکراشى کردووە؛ لە رێكخراوی تر مەكینەی خەیاتی، مەكینەی ئۆڤەرو نەخش و ئوتوو درێل و گسكی كارەباو و جزدان بە پارەوە و جانتاشیان بردوون.
سەنتەری میترۆ، لەگەڵ بیستنی هەواڵەكە دەستی بە پەیوەندییەكانی كرد، لەگەڵ ئەوەی زانیارییەكان پشتڕاستدەكرێنەوە، بەڵام توشی سەرسوڕمان بوو لەوەی كەس ئامادە نییە بەناوی خۆی و رێكخراوەكەی لێدوان بدات، نزیكەی دوو هەفتەیە بێدەنگن.
میتر جەخت دەکاتەوە، هێرش بۆ سەر ئەو باڵەخانەیەی كە ئۆفیسی چەند رێكخراوێكی ناوخۆی و بیانی لەخۆ دەگرێت، زەوتكردنی كەرەستەكانی و بردنی بۆ شوێنی نادیار، هیچ بنەمای یاسایی نییەو پێشێلكاری ڕوونی یاسای مرۆیی نێودەوڵەتیە و رێگری لە كاری ئەو ڕێكخراوانە دەكات بۆ ئەنجامدانی كارەكانیان، مەترسی ئەوەشی هەیە هەرێمی كوردستان بخاتە زۆنی سور بۆ كاری رێكخراوی بیانی.
میترۆ ئاگادارە لەوەی ئەو رێكخراوانە هیچ پەیوەندییەكیان بە ململانێی سیاسی و چەكداریی ئەم دواییە نییە، تا تا بكرێتە پاساو بەو شێوەیە دەستبگرن بەسەر كەلوپەلی ئەو رێكخراوانە، داوا دەكات داوای لێبوردنیان لێبكرێت و قەرەبووی زیانەكانیان بكرێتەوە.
“پێویستە هەموو لایەنەكان ئۆفیسی رێكخراوە ناوخۆیی و بیانییەكان بپارێزن داوا لە دامەزراوە میدیا سەربەخۆكان دەكەین پەردە لەسەر ئەم پێشێلكاریانە هەڵماڵن بە زانیاری زیاتر رای گشتی لێ ئاگاداربكەنەوە”، سەنتەرى میترۆ وا دەڵێت.
لەبارەی سەنتەری میترۆوە:
سەنتەری میترۆ لە ئابی 2009 بە هەوڵی كۆمەڵێك رۆژنامەنووس و بەرگریكاری مافی مرۆڤەوە، بە هاوكاری رێكخراوی پەیمانگای رۆژنامەنووسانی جەنگ و ئاشتی IWPR ی ئەمریكی دامەزاروە، لەو كاتەوە 14 راپۆرتی ساڵانەی دەربارەی رەوشی ئازادی رۆژنامەگەری بڵاوكردۆتەوە، لەسەرەتای دامەزراندنیەوە هەریەك لە رێكخراوەكانی (IWPR) و رێكخراوی گەلی نەرویژی (NPA) و پاڵپشتی میدیای نێودەوڵەتی (IMS)، Gulf Center for Human Rights، وەزارەتی دەرەوەی ئەمریكا، Intenews، رێكخراوی IRI ، لە رێگەی پرۆژەوە پاڵپشتییان كردووە.
رێکخراوى CPTـى ئەمریکى: سەنتەرى میترۆ بەردەوام دەبێت