لە کۆبانێوە دەستیپێکرد؛ 13 ساڵ بەسەر شۆڕشى رۆژئاواى کوردستان تێدەپەڕێت

وریا فەتاح

سبەینێ، 13 ساڵ بەسەر دەسپێکردنى شۆڕشى رۆژئاواى کوردستان تێدەپەڕێت کە رۆژى 19ـى تەموزى 2012 لە شارى کۆبانێیەوە دەستیپێکرد و دواى کۆنتڕۆڵکردنى سەرجەم دامودەزگاکان، لە ماوەیەکى کورتدا سەرجەم ناوچەکانى رۆژئاواى کوردستان لە دەست رژێمى سوریا دەرهێنرا.

بەڕێوەبەرایەتیی خۆسەری دیموکراتیی هەرێمی باکوور و رۆژهەڵاتی سووریا، لە یادی سێزدەهەمین ساڵیادی شۆڕشەکەدا راگەیەندراوێکى بڵاوکردەوە و تێیدا هاتووە،” ئەو شۆڕشەی کە بووە خاڵی وەرچەرخانێکی چارەنووسساز لە مێژووی گەلان و پێکهاتەکانی ناوچەکەدا و قۆناغێکی نوێی دامەزراند کە ناونیشانی ئازادی، کەرامەت، پێکەوەژیان و دادپەروەریی کۆمەڵایەتییە.”

بەڕێوەبەرایەتیی خۆسەر ئاماژەی بەوەداوە کە شۆڕشەکە لە کاتێکی هەستیاردا هەڵگیرسا کاتێک سووریا لە “گێژاوی توندوتیژی و ستەمکاریدا” نوقم ببوو.

بەڕێوەبەرایەتى خۆسەر روونیى کردووەتەوە، لەماوەى رابردوودا توانیویانە بناغەکانی ئیدارەی مەدەنی، بەشداریی هەموو پێکهاتەکان لە بڕیاردان و بەرقەرارکردنی ئاسایش و سەقامگیری دابمەزرێنێت، وەک دەڵێت،”ئەمەش وایکردووە ناوچەکانی باکوور و رۆژهەڵاتی سووریا ببنە نموونەیەکی پەیڕەوکراو لەسەر ئاستی سووریا لە پێکەوەژیانی ئاشتیانە، حوکمڕانیی دروست و گەشەپێدانی کۆمەڵایەتی.”

داواشى کردووە بە یەکخستنی هەوڵەکان دەتوانرێت پارێزگارى لە دەستکەوتەکان بکرێت و پەرە بە پڕۆژەى دیموکراتی و بەشداریکردنى کاریگەرى لایەن و پێکهاتەکان و بنیاتنانى سوریایەکى نوێ بکرێت.