لەناو خۆپیشاندەرانی دەربەندیخاندا مانگرتن دەستیپێکرد

964+

توانا نەقی

هاوڵاتییانی قەزای دەربەندیخان، ماوەی 12 رۆژە لە ناڕەزایەتی دەربڕین و خۆپێشاندان بەردەوامن و لەسەر شەقام دەمێننەوە، بەشێک لە خۆپێشاندەرانیش مانگرتنیان لەخواردن و خواردنەوە راگەیاند.

داواکارییەکانی خۆپێشاندەرانی دەربەندیخان پێکدێت لە سێ بابەتی سەرەکی، ئەوانیش دابینکردن و پاککردنەوەی ئاوی خواردنەوە  و هەڵگرتنی پێوەری ئاو و  زیادکردنی کاتژمێرەکانی کارەبای نیشتمانی.

سلێمان محەمەد، قایمقامی دەربەندیخان بە تۆڕی964ی راگەیاند، ماوەی 12 رۆژە بەشێک لەهاوڵاتییانی قەزاکە لەسەر شەقامن و هەموو هەوڵێکی خۆمانمان خستووەتەگەڕ بۆ ئەوەی داواکارییەکانیان جێبەجێ بکەین.

وتیشی، داواکارییەکانمان گەیاندووەتە ئەنجومەنی وەزیران و ئێمەش وەک ئەوان چاوەڕوانین کە وەڵامان بدرێتەوە، داواکارییەکان داوای رەوای هاوڵاتییانن و مافی خۆیانە کە بۆیان جێبەجێ بکرێت.

فەرمان عەبدولرەحمان، چالاکوان لە خۆپێشاندانەکانی دەربەندیخان بە تۆڕی964ی وت، لە ئەمڕۆ 12.2.2023وە حەوت کەس لە خۆپێشاندەران بەتەواوەتی مانیان لە خواردن و خواردنەوە گرتووە و خۆپێشاندانیش تائێستا هەر بەردەوامە.

دەشڵیت: کەس وەڵامی داواکاری خۆپێشاندەرانی نەداوەتەوە و ئێمەش بڕیارمانداوە تا داواکارییەکانمان جێبەجێنەکرێت لەسەر شەقام دەمێنینەوە و بەردەوام دەبین.

قەزای دەربەندیخان سەر بە پارێزگای سلێمانییە و خاوەنی یەکێکە لە بەنداوە گەورەکانی هەرێمی کوردستان، بەڵام خەڵکەکەی بەدەست کێشەی ئاوی خواردنەوە و بێکارەباییەوە دەناڵێنن.