“دیداری سلێمانی كاریگەریی زۆری دەبێت و راسپاردەكان دەگەیەنێت”

964+

دیلان محەمەد جەزا – سلێمانی

وتەبێژی دیداری سلێمانی دەڵێت، دیدارەكانی پێشوو شایەدی ئەوەن كە دیداری سلێمانی كاریگەریی خۆی هەیە، دەشڵێت، لە دوای كۆتاییهاتنی دیدارەكە، پێشنیار و راسپاردەكان دەگەیەندرێتە لایەنی پەیوەندیدار.

ئارام قادر كۆكۆیی، لە پەراوێزی دیداری سلێمانی بۆ 964 قسەی كرد و رایگەیاند، لە دیدارەكەدا كۆمەڵێك بابەتی گرنگی هەنووكەیی قسەوباسی لێوە دەكرێت، لەوانە پێكهێنانی كابینەی دەیەمی حكومەتی كوردستان، هەڵبژاردنی ئەمساڵی عێراق، ئەجێندا و كاری حكومەتەكانی عێراق و كوردستان، پرسی نێوان ئەمریكا و ئێران و بابەتی وزە و چەند تەوەرێكی دیكە.

ئاماژەی بەوەش دا، دیداری سلێمانی هەمیشە كاریگەریی خۆی هەبووە و لە دوای كۆتاییهاتنی دیدارەكەش، پێشنیار و راسپاردەكان دەگەیەندرێتە لایەنە پەیوەندیدارەكان.

ئەمڕۆ چوارشەممە 16.4.2025 دیداری سلێمانی لە زانكۆی ئەمریكی دەستیپێیكرد و دوو رۆژ بەردەوام دەبێت، كۆمەڵێك كەسایەتی سیاسیی كوردستان، عێراق و جیهان بەشدارن و گفتوگۆ و پانێل دێنە ئەنجامدان.

پێداچوونەوە: ئەرسەلان عەبدوڵا