کتێبی منداڵانیش هاتوونەتە پێش
لە سلێمانی بیرەوەرییەكانی رەفیق سابیر و رۆمانەكانی نۆردان دامڵە پڕ فرۆشترینن
964+
ئەحمەد محەمەد – سلێمانی
لە چەند هەفتەی رابردوو پڕ فرۆشترینەکانی کتێب لە سلێمانی، جۆراو جۆربوون هەریەك لە رۆمان و كتێبەكانی گەشەپێدانی مرۆیی و كتێبە بیرەوەرییەكان ترێندن، ئەمجارە كتێبی منداڵانیش هاتوونەتە پێش و خوێنەری باشیان هەیە.
هەر یەک لە رۆمانەكانی “نوردان دامڵە” کە باس لە ژیاننامەی خێزان و كچەكانی پەیامبەری ئیسلام بە شێوەی رۆمان، لەگەڵ بیرەوەرییەكانی رەفیق سابیر “لە ستایشی ژیاندا”، خوێنەرێکی باشیان هەیە، رۆمانێكی فارسییش بە ناوي “پشت كۆڵانەكانی بێدەنگی” كە وەرگێڕدراوەتە سەر زمانی كوردی، هەروەها كتێبێكی منداڵانیش بەناونیشانی “منداڵێكی باش بە” پڕفرۆشترینەکانی ئەم چەند هەفتەیەن لە كتێبخانەكانی سلێمانی.
كتێبەكانی گەشەپێدانی مرۆیی ئێستا باون
لەپاڵ ئەمەش، كتێبەكانی گەشەپێدانی مرۆیی ئێستا بوونەتە باو لە كتێبخانەكانی سلێمانی و هەرهەفتەیە و یەكێكیان ترێندن، “هونەری گفتوگۆكردن” لەو كتێبانەیە و خوێنەرێكی زۆری هەیە.
كامیل محەمەد، بەرپرسی ناوەندی چاپی چوارچرا، بۆ964 وتی، لەچەند هەفتەی پێشوو لە كتێبخانەی ناوەندەكەمان دوو كتێب پڕفرۆشترین بوون ئەوانیش، “لەستایشی ژیاندا” بیرەوەرییەكانی رەفیق سابیر، كەپێم وایە لەناو سیاسییەكاندا باشیرین و راستگۆترین بیرەوەری نوسیوە، كە باسی تەواوی ژیانی سیاسی و پێشمەرگایەتی خۆی دەكات، كتێبی دووەمیش، رۆمانی پشت كۆڵانەكانی بێدەنگییە كەرۆمانێكی فارسییە و یەكێكە لەباشترین رۆمانەكان، بەخوێندنەوەی وادەكات دوور بین لە تاوان، داوا دەكەم هەموو گەنجان و خێزانەكان بیخوێننەوە.
لە زیاتر لە 200 چاپخانە لە سلێمانی تەنیا 10یان كاردەكەن
وتیشی، ئێستا چاپخانەكان لە قیراندان و زۆربەیان داخراون، لە كۆی زیاتر لە 200 چاپخانە لە سلێمانی، تەنیا 10چاپخانە كاردەكەن و هەمووی لە بێكاریدا دایخستووە، وەكو ناوەندی چاپی چوارچرا پێشوتر 26 كارمەندم هەبووە، بەڵام ئێستا تەنیا یەك كارمەندم ماوە و ئیشوكارمان زۆر كزبووە، هۆكاریش بێ پلانی حكومەتە، بەشی زۆری كتێبەكان بۆچاپكردن دەبرێنە وڵاتی ئێران، چونكە لەوێ بەنرخێكی هەرزانتر چاپدەكرێن.
“بەوەزیری رۆشنبیریم وت، كە دۆخی چاپخانەكان ئاوایە وتی، ئێمەش پێمان چار ناكرێت، بازاڕی ئازادە” بەرپرسی ناوەندی چاپی چوارچرا وای وت.
عومەر تۆفیق، خاوەنی كتێبخانەی بەختیارییە لە شەقامی مەولەوی و دەڵێت، پڕفرۆشترینی ئێمە دوو كتێب بووە، ئەوانیش كتێبی “هونەری گفتوگۆكردن” كە كتێبێكی گەشەپێدانی مرۆییە و باس لەتوانای گفتوگۆكردنی مرۆڤ و شێوازی تێگەیاندنی بەرامبەر دەكات، كتێبی دووەمیش كتێبێكی منداڵانە بەناوی “منداڵێكی باش بە” كە كتێبێكی ئینگلیزیی- كوردییە لەشێوەی چیرۆك و بۆ فێربوونی زمانی ئینگلیزی زۆرباشە.
رۆمانەكانی نوردان دامڵە خوێنەری باشی هەیە
هەورین حەمەئەمین، خوێنەرێكی كتێبە لە سلێمانی و سەبارەت بە ترێندی خوێنەران قسەی بۆ 964 كردووە و دەڵێت، لەئێستادا لەناو خوێنەرانی كتێب، رۆمانەكانی نوسەری تورك نوردان دامڵە خوێنەرێكی باش و فرۆشێكی زۆرباشیشی هەبووە، ناوەڕۆكی ئەم رۆمانانە لەشێوەی ژیاننامە باس لە ژیانی كچ و خێزانەكانی پەیامبەری ئیسلام دەكات.
باسی لەوەشکرد، رۆمانی سمبولی وەفا و خۆڕاگری زەینەب، رۆمانێكی زۆرتایبەتە، لەكاتی خوێندنەوەیدا چەند جارێك دڵم پڕبووە و گریاوم بۆی، ئەم رۆماننوسە زۆر تەڕو پاراو نوسیویەتی، کە رۆمانەکە دەخوێنیتەوە چێژی لێدەبینی، هەم زانیاری لەسەر ژیاننامەیان وەردەگری هەم وانەیەكیشیان لێوە فێردەبی، زۆریش وردە و چەندان رووداوی مێژوویی تێدایە، کە لەسەر رووداوەکە زانیارییەکە و چێژی خوێندنەوەش وەردەگری.
پێداچوونەوە: ژێوار خدر
