رێگای دوکان بۆ سلێمانی و هەولێر و راپەڕینیان داخست
دانیشتووانی دوکان دژی لێبڕینی کارەبا بۆ پێنج کاتژمێری رۆژانە گردبوونەوە
964+
ئەحمەد محەمەد – سلێمانی
دانیشتووانی قەزای دوكان رۆژانە چوار بۆ پێنج کاتژمێر کارەبای نیشتمانیان لێدەکوژێنرێتەوە، هەر لەبەر ئەوە گردبوونەوە و رێگای دوکان بۆ سلێمانی و هەولێر و راپەڕینیان داخست.
خۆپیشاندەران رێک لەسەر پردەكەی دوكان گردبوونەتەوە و رێگای پردەکەیان داخستووە کە رێگایەکی سەرەکییە بۆ سلێمانی و هەولێر و ئیدارەی راپەڕینیش.
چۆمان ئەسعەد بەشداربوویەکی گردبوونەوەکە بە 964ی وت، “بەهیچ جۆرێك كەمكردنەوەی كارەبای قەزای دوكان قبوڵ ناكەین، لەقەزاكەمان كارەبا بەرهەمدەهێنرێت و دەبێت كارەباكەمان بۆ چاكبكەنەوە.”
باسی لەوەشکرد، رۆژانە چوار بۆ پێنج كاتژمێر كارەبایان لێدەبڕن، دوكان كارەبای مۆلیدەی نییە و بەبڕینی كارەبای نیشتمانی گرفتی زۆر بۆ دانیشتوانی قەزاكە دروست دەبێت.
چۆمان ئەسعەد داوایشی لە بەرپرسانی قەزای دوکان کرد، بەدەم داواكارییەكەیانەوە بچن و چارەسەری کێشەکەیان بكەن.
پێداچوونەوە: شۆڕش قادری
