بەهۆی نەبونی نوسینی زمانی کوردی لەسەر دەروازەی خورماتوو نیگەرانی هاوڵاتیانی لێکەوتوەتەوە

964+

سیروان خورشید – دوزخورماتوو

ماوەی ساڵێکە دەستکراوە بەدروستکردنی دەروازەی هاتنەژورەوەی خورماتوو، ئێستاو دوای تەواوکردنی لە %75ـی کارەکانی و بەکارهێنانی تاکە زمانی عەرەبی لەسەری، هاوڵاتیانی خورماتوو نیگەران کردووەو دەڵێن پێویستە لە پاڵ نوسینە عەرەبیەکە زمانی کوردیش بنوسرێت، بۆ ئەوەی جیاوازی دروست نەبێت و دان بەوەدا بنرێت کە خورماتوو موڵکی ھیچ نەتەوەو لایەنێک نیە.

مەحەمەد جاسم، چالاکوانی مەدەنی خورماتوو بە964ـی وت، ئەرکی سەرشانی ئیدارەی شار و نوێنەرانی کوردە لەخورماتوو لە پاڵ نوسینە عەرەبیەکە زمانی کوردیش بنوسرێت بۆ ئەوەی جیاوازی دروست نەبێت و پێویستە ھاوشێوەی شاری کەرکوک کە فرە نەتەوەییە بەزاراوەی ھەر سێ نەتەوەکان لەدەروازەی شار و ھێماکانی ھاتووچۆ و ھێماکانی تری نێو شار بنوسرێت”.

قاسم عەلی، بەرپرسی بەشی راگەیاندنی قایمقامیەتی خورماتوو بە964ـی وت، بڕیاری نوسین بەزمانی عەرەبی لەسەر دەروازەکە بەبڕیاری پارێزگای سەڵاحەدین بووە، ئەوان پابەندی بڕیاری سەروی خۆیانن و تا تەواوبونی بەشەکانی تری دەروازەکە گەر هەر بڕیارێکی دیکەیان بۆ هات لەسەر زیادکردنی زمانی کوردی، ئەوان دەستبەجێ بڕیارەکە جێبەجێ دەکەن زمانی کوردیشی بۆ زیاد دەکەن”.

964 پەیوەندی بەلایەنە کوردیەکانی قەزاکەوە کرد و ئەوان لەئێستادا ئەندامێکی کوردی ئەنجومەنی پارێزگای سەڵاحەدینان راسپاردووە بۆ چارەسەرکردنی کێشەکە”.

لەدوای پڕۆسەی ئازادیەوە یەکەم جارە دەروازە بۆ قەزای خورماتوو دروستبکرێت و دەروازەکە دەکەوێتە باکوری قەزاکەوەو رێگای سەرەکی هاتوچۆی لەسەرەو هەرێم بەبەغدا دەبەستێتەوە.

پێداچوونەوە: ژێوار خدر

هاوڵاتی خۆبەخش لە دوزخورماتوو تاسەکانی سەر رێگەی بەغدا رەنگ دەکەن