بومەلەرزە بەشێک لە قەڵا بەناوبانگەکەی غازی عەنتابی داڕوخاند

بومەلەرزە بەهێزەکەی بەرەبەیانی ئەمڕۆی تورکیا، بەشێک لە قەڵای دیلۆکی داڕووخاند، کە دەکەوێتە شاری غازی عەنتاب و تەمەنی بۆ نزیکەی دوو هەزار ساڵ لەمەوبەر دەگەڕێتەوە.

ئەو قەڵایە لە سەردەمی رۆمانییەکان دروستکراوە، سەرەتا وەکو بنکەی پۆلیس بەکارهاتووە، لە سەدەیی دووەم و سێیەمی زایینی، بەرزییەکەی 30 مەترە و 12 قولەی چاودێریکردنی تێدا بووە.

بەرەبەیانی ئەمڕۆ دووشەممە، بومەلەرزەیەکی بەهێز بە گوڕی 7.8 پلەی رێختەر تورکیا و سوریای بە توندی هەژاند و لە چەندین وڵاتیش هەستی پێکراوە لەناویاندا عێراق و هەرێمی کوردستان.

تاوەکو ئێستا بەهۆی بومەلەرزەکەوە لەو دوو وڵاتە زیاتر لە 600 کەس گیانیان لەدەستداوە و زیاتر لە سێ هەزار کەسیش بریندار بوون.