هیچ پلەیەکى نەبووە
لە زاخۆ کەسێک بە جلوبەرگى سەربازییەوە دزى لە خەڵک کردووە
964+
وریا فەتاح
وەک دەڵێن خویەک بیگرى بەشیرى تەرکى ناکەى بە پیرى، پۆلیسى زاخۆ، دەستگیرکردنى تۆمەتبارێکى راگەیاند کە جلوبەرگى سەربازى لەبەرکردووە و لەو رێگەیەوە دزى لە خەڵک کردووە، پێشتریش بە هەمان تۆمەت دادگایى کراوە و زیندانى کراوە.
پۆلیسى زاخۆ لە گرتەیەکى ڤیدیۆیدا کەئەحمەد رەمەزان، بەرێوەبەرى راگەیاندنى پۆلیسى زاخۆ قسەى تێدا دەکات، دەستگیرکردنى تۆمەتبارێکى راگەیاند کە جلوبەرگى سەربازى لەبەرکردووە و دزى لە خەڵک کردووە.
بە وتەى ئەحمەد رەمەزان، ئەو کەسە بەجلوبەرگى سەربازییەوە کە هیچ پلەیەکى سەربازى نەبووە، لەسەر جادە و شەقامەکان وەستاوە و ویستوویەتى لە رێگەى جلوبەرگەکەیەوە گومانى لەسەر نەبێت و دزى لە خەڵک کردووەو پارە و کەلوپەلى گرانبەهاى لێ بردوون.
“ئەو تۆمەتبارە پێشتر بە هەمان تۆمەت دادگاى کراوە و سزا دراوە، بەڵام دواى تەواو بوونى ماوەى یاساییەکەى گەڕاوەتەوە سەر هەمان کار”، ئەحمەد رەمەزان واى وت.
