رووداوێکى هاتوچۆ سێ گیانلەدەستدان و دوو بریندارى لێکەوتەوە

شۆڕش قادری

جارێکی تر رووداوەکانی هاتوچۆ لە رۆژهەڵاتی کوردستان قوربانی لێدەکەوێتەوە و بەوهۆیەوە لە بۆکان سێ کەس گیانیان لەدەست دا و دووی دیکەش بریندار بوون.

ئاژانسی هەواڵی مێهر لە زاری عەلی حوسێن زادە بەڕێوەبەری تەندروستی بۆکان بڵاویکردووەتەوە، “لە سەر رێگای نێوان بۆکان – شاهین دژ لە سنووری گوندی (یەک شەوە) رووداوێکی هاتوچۆ لە نێوان دوو ئۆتۆمبێل لە جۆرەکانی بیجۆ و پراید روویداوە و لە ئاکامدا سێ کەس گیانیان لەدەستداوە و دووی دیکەش بریندار بوون”.

“دوو کەس لەوانەی گیانیان لەدەستداوە پیاو و کەسێکیشان ژنە و بریندارەکانیش رەوانەی نەخۆشخانەی بۆکان کراون”، عەلی حوسێن زادە وادەڵێت.

ئاماژەی بەوەشکردووە، بەڕێوەبەرایەتی هاتوچۆی بۆکان لێکۆڵینەوەی لە هۆکاری رووداوەکە دەستپێکردووە.

رێگای بۆکان – شاهین دژ لە پارێزگای ورمێ یەکێکە لە رێگا مەترسیدارەکان و ساڵانە چەندین رووداوی هاتوچۆی تێدا روودەدات.