لەمەودوا هەر بریکارێکی غاز وەڵامی تەلەفۆن نەداتەوە سزا دەدرێت

ژێوار خدر

لە چەند رۆژی رابردوودا، بەشێک لە هاوڵاتییانی قەزای پشدەر ناڕەزایەتییەکی زۆریان دەربڕی، بەهۆی ئەوەی لەلایەن بریکارەکانی غازەوە پشتگوێ خراون و کەس نییە غازیان بۆ پڕ بکاتەوە.

بڕیار وایە لە رۆژی یەکشەممەی داهاتووەوە، هەر بریکارێکی غاز وەڵامی پەیوەندی هاوڵاتییانی نەداتەوە سزا بدرێت.

ئەبوبەکر خدر، نوێنەری بەڕێوەبەرایەتی نەوت و کانزاکی راپەڕین بە 964ـی وت، دوای بیستنی ناڕەزایەتییەکانی هاوڵاتیان، بڕیارماندا هەر بریکارێک هاوڵاتیان پشتگوێ بخات یان غاز بۆ ناوچەیەکی جیاواز لەو ناوچەیە بەرێت کە بۆی دیاری کراوە، سزا دەدرێت و سزاکەشی پێبژاردن دەبێت.

وتیشی، ”جارێ تەنیا ناوی ئەو ماڵانە وەردەگرین کە بەسەر بریکارەکاندا دابەش کراون و لای خۆمان لیستێک درووست دەکەین، بڕیارەکە لە رۆژی یەکشەممەی داهاتووەوە جێبەجێ دەکەین، هەرچەندە جارێ بە تەواوی دڵنیانین، بەڵام بڕی پێبژاردنەکە لە دەورووبەری 250 هەزار دینار دەبێت بۆ هەر سەرپێچییەک.”