لە سەیدسادق ئەو مۆلیدەیەى زوو زوو دەشکا بڕیارى گۆڕینى درا

وریا فەتاح

دانیشتوانى گەڕەکى سەرایى لە سەیدسادق، بەدەست مۆلیدەى گەڕەکەکەیانەوە گیریان خواردبوو بۆیە قایمقامییەتى شارەکە بڕیار دەدات کەسێکى دیکە بێت و مۆلیدەیەکى نوێ دابنێت.

قایمقامییەتى سەیدسادق ئاگادارى دانیشتوانى قەزاکەى دەکات، هـەر هاووڵاتیــەک ئارەزوومەندە بە دانـانی مۆلیـدەی کارەبـایـی ئـەهلی بـۆ ماڵـەکانـی گـەڕەکـی سەرایـی، دەتوانێت سبەینێ چوارشەممە 7.8.2024، سەردانى دیوانى قایمقامییەت بکات و داواکارى پێشکەش بکات.

تەها ئەحمەد بەرپرسى راگەیاندى قایمقامییەتى سەیدسادق بە 964ـى وت، لەسەر داوا و ناڕەزایەتى دانیشتوانى گەڕەکى سەرایى، قایمقامییەت بڕیاریدا بە گۆڕینى ئەو مۆلیدەیەى ئێستا هەیە و داوا کراوە هەرکەسێک دەیەوێت مۆلیدە دادەنێت بێت و داواکارى پێشکەش بکات.

وەک باسى دەکات، دانیشتوانى گەڕەکەکە کە ژمارەیان 700 بۆ 1000 ماڵ دەبێت، چەندین جار گلەیى و رەخنەى خۆیان بۆ قایمقامییەت بردووە، چونکە مۆلیدەکە زوو زوو دەشکا و درەنگ هەڵی دەکردەوە.

“هەرچەندە چەندین جار لەلایەن قایمقامییەتەوە سزادراوە و ئاگادار کراوەتەوە، بەڵام خاوەنەکەى پابەند نەبووە بۆیە بڕیاردراوە بە گۆڕینى”، تەها ئەحمەد واى وت.

ئاشکراسى دەکات، هەرکەس بیەوێت مۆلیدەى نوێ لەشوێنى ئەو مۆلیدەیە دابنێت، پێویستە مۆلیدەیەکى یەدەگیشى هەبێت و پابەندى رێنماییەکان بێت بەتایبەت زوو کارپێکردنەوەى لە دواى کوژانەوەى کارەباى نیشتمانى.

بەرپرسى راگەیاندى قایمقامییەتى سەیدسادق:

لەناو گەڕەکەکانى قەزاى سەیدسادق 35 مۆلیدەى کارەبایى ئەهلیى هەیە و 5 مۆلیدەیەکی ئەهلیش لە گوندەکانن و زۆربەى گوندەکانیش مۆلیدەى حکومیان هەیە