حەوت رێنمایی لە کشتوکاڵی هەولێرەوە بۆ رێگریکردن لە ئاگرکەوتنەوە

ژووری هەواڵ

کشتوکاڵی هەولێر حەوت رێنمایی بەمەبەستی رێگریکردن لە ئاگرکەوتنەوە لە دەغڵودانەکانی سنوری پارێزگاکە بڵاوکردەوە و داوا لە جوتیاران و خاوەن دەراسەکان دەکات پابەندبن.

ئەمڕۆ هەینی 24.5.2024، هێمن سەید موراد، بەڕێوەبەری کشتوکاڵی هەولێر بە 964ـی راگەیاند، رێنماییەکان بەمەبەستی گرتنەبەر رێکاری پێشوەختەیە و دەیانەوێت رێگری لە کەوتنەوەی ئاگر بکەن لەکاتی پرۆسەی دروێنەکردن.

وتیشی،”تائێستا دوو رووداوی ئاگرکەوتنەوە لە دەغڵودانی جوتیارانی هەولێر روویداوە، یەکێکیان ئەمڕۆ بەهۆی هەورەبروسکەوە بووە و ئەوەی دیکەشیان بەهۆی دروستبوونی شۆرتی کارەبا کەوتووەتەوە”.

رێنماییەکان ئەمانەن:

1 – پێویستە ئامێری ئاگر کوژێنەوە CO2 (شەش کیلۆیی) لەناو دەراسەکاندا هەبێت.
2 – نابێت بە هیچ شێوەیەک کرداری لەحیم کردن لە ناو کێلگەی گەنم و جۆ ئەنجام بدرێت.
3 – وشیار بوونی شوفێری دەراسە لە کاتی بوونی هێلی کارەبا لە ناو کێلگە.
4 – چاککردنی رێگای نێوان توخوبەکان و رێگای چوون بۆ سەر زەوییەکان بۆ ئاسان گەیشتنی تیمەکانی بەرگری شارستانی.
5 – پێویستە هەر دەراسەیەک بە بەردەوامی تانکەرێک ئاوی بە پڕی لەگەڵدا بێت لە کاتی ئیش کردندا و ترومپای ئاوی لەسەر بێت، بۆ ئەوەی لە کاتی روودانی هەر ئاگرێک بتوانن بە زووترین کات هەوڵی کونترۆل کردنی بدەن.
6 – شوفێری دەراسەکان خۆیان بە دوربگرن لە جگەرە کێشان ئەگەر کێشای نابێت فڕێی بداتە ناو کێلگەکان.
7 – هەبوونی ژمارەی تەلەفۆنی بنکەکانی بەرگری شارستانی و تەلەفۆنە پێویستەکانی تر: تەلەفۆنی بەرگری شارستانی : 115 و 125 تەلەفۆنی فریاگوزاری سنوورەکە: 122

بە وتەی بەڕێوەبەری کشتوکاڵی هەولێر، نزیکەی یەک ملیۆن دۆنم زەوی لە پارێزگاکە بە گەنم چێندراون.