بەڕێوەبەرى ناحیەى ناڵپارێز لەسەر رێگاى ناڵپارێز بۆ پێنجوێن سەردانى تیمەکانى نۆژەنکردنەوەى رێگەکەى کردووە وێنە: ناحیەى ناڵپارێز
دواى دوو ساڵ هەوڵدان
رێگایەکى سەرەکى پێنجوێن نۆژەن دەکرێتەوە
964+
وریا فەتاح
وەزارەتى دارایى رەزامەندی دا لەسەر خەرجکردنى بڕە پارەیەک بۆ نۆژەنکردنەوەى رێگاى نێودەوڵەتیى دەروازەى باشماخ لە سنوورى ناحیەى ناڵپارێز.
رێگاکە، پێنجوێن و دەروازەى نێودەوڵەتى باشماغ بە سلێمانى دەگەیەنێت، ئەو شوێنەى نۆژەن دەکرێتەوە، دەکەوێتە سنوورى ناحیەى ناڵپارێز.
هێمن ئیبراهیم، بەڕێوەبەرى ناحیەى ناڵپارێز بە 964ـى وت،”پاش هەوڵ و ماندووبون و بەدواداچاونێکى زۆر، دواجار وەزارەتى دارایى رەزامەندی دا لەسەر خەرجکردنى بڕى 60 ملیۆن و 996 هەزار دینار، بۆ نۆژەنکردنەوەى ئەکتافى رێگەى سەرەکى ناڵپارێز بۆ پێنجوێن.
ئەکتاف، واتا چاککردن و رێکخستنى ئەملاولاى شەقامەکە و لێوارەکانى
نۆژەنکردنەوەکە بە درێژایى 13.4 کیلۆمەتر دەستیپێکردووە، بە وتەى بەڕێوەبەرى ناحیەى ناڵپارێز دواى ئەو قۆناغە نۆژەنکردنەوەى قیرى رێگاکە دەستپێدەکات.
رێگاکە بەهۆى ئەوەى دەروازەى نێودەوڵەتى باشماخى لەسەرە، رێگایەکى سەرەکى و نێودەوڵەتییە و قەرەباڵغییەکى زۆرى لەسەرە.
