جوتیاران پەرەیان پێداوە
قارچکەکەی پێنجوێن لە سلێمانی بازاڕی گەرمە
964+
رێژوان مامە قادر – سلێمانی
قارچکی پێنجوێن لە سلێمانی بازاڕی گەرمە و فرۆشیارێک دەڵێت، رۆژانە لەنێوان 30 تا 100 کیلۆ دەفرۆشن.
قارچکەکە قەبارەی گەورەیە و تێیدایە دانەی نیو کیلۆ زیاتر دەبێت.
قادر مەحمود، کە لەناو بازاڕی سلێمانی ئەو قارچکە دەفرۆشت بە 964ـی راگەیاند، قارچکی پێنجوێن خواستێکی زۆری لەسەرە و هاوڵاتیان هەم بەلایانەوە سەرنجڕاکێشە و هەم حەزیشیان لێیەتی.
وتیشی، “کیلۆی بە شەش هەزار دینارە و قارچکی بەرهەمهاتووە، واتا جوتیارەکانی پێنجوێن بەرهەمیدەهێنن و هەموو کاتێکی ساڵیش بەردەستە و هەیە، تەنیا بەهۆی کەشوهەوای گەرمەوە هاوینان کەمێک بەرهەمەکەی کەمدەبێتەوە”.
بەپێی ئەو زانیاریانەی 964 لە کشتوکاڵی سلێمانیەوە وەریگرتووە، لە هەرێمی کوردستان 10 کارگەی بەرهەمهێنانی قارچک هەیە و بەرهەمەکانیان لەناو بازاڕەکانی کوردستان ساغ دەکەنەوە.
بە وتەی ئەو فرۆشیارە، کارگەکان ئەو قارچکە گەورەیە بەرهەمناهێنن، بەڵکو جوتیارەکان لە رێگەی بەرهەمهێنانی تایبەتی خۆیانەوە بەو جۆرە پەرەیان پێداوە.
پێداچوونەوە: هاوبەش
