لەسەر دوو هەزار مەتر
گۆڕەپانی راپەڕین لە رانیە دروستدەکرێت
964+
پێشەوا محەمەد
شارەوانیی رانیە گۆڕەپانی راپەڕین لە ناوەندی قەزای رانیە دروستدەکات، بەپێی راگەیەندراوێکی بەڕێوەبەرایەتییەکە، گۆڕەپانەکە شێوەیەکی نموونەیی و سەردەمییانەی دەبێت.
گۆڕەپانەکە لەسەر رووبەری دوو هەزار مەتر دروستدەکرێت، کە پێشتر قوتابخانەی رانیەی بنەڕەتی بووە و ماوەیەک بەرلەئێستا شارەوانیی رانیە رووخاندی.
بەپێی راگەیەندراوێکی شارەوانیی رانیە، کە ئەمڕۆ سێشەممە 30.4.2024 بڵاویکردووەتەوە، ناوەندی شاری رانیە ناوەندێكی چالاکی قەرەباڵغە و پێویستی بە گۆڕەپانێكە بۆ خاڵی كۆكردنەوەی وزەی زیندووی خەڵکی ناوخۆ و سەردانکەران بە مەبەستی شوێنێکی ئارام و پیاسەیەكی ئارام.
ئاماژە بەوەش دراوە، دیزاینی گۆڕەپانی راپەرین لە ناوەندی شاری رانیە لە شێوەی دڵی شارەكە خزمەت دەکات بۆ پشوودان و توندووتۆڵكردنی پەیوەندییە کۆمەڵایەتییەكان و چالاكییە جۆراوجۆرەكانی کۆمەڵگا، چ لە شێوەی میوانداریی فێستیڤاڵە کولتوورییەکان بێت یان نمایشی راستەوخۆ یان بۆ دانیشتن و چێژوەرگرتن لە دەوروبەرەکە.
گۆڕەپانەکە پێکدێت لە:
*گۆڕەپان
*دیوارێكی هونەریی گەورە بۆ دەرخستنی كولتووری شار و ناوچەكە بە شێوەی بارز.
*سەوزایی بە شێوەی تەپۆلكەی مۆدێرن.
*پیادەڕۆی كۆنكرێتی جوڵە ئاسان.
*ئاڵایەكی بەرزی كوردستان، كە لە هەموو ئاراستەكانی شارەوە دەربكەوێ وەك ئاماژە بۆ دەرخستنی ناوەندی شار.