بۆ خاوەن پێداویستی تایبه‌تى نادیاره
له هه‌ڵه‌بجه پڕۆژەی (گوڵەبەڕۆژە) راگەیەنرا
964+
فه‌رهاد حه‌سه‌ن
له هه‌ڵه‌بجه پڕۆژەی (گوڵەبەڕۆژە) راگه‌یه‌ندرا، كه تایبه‌ت به خاوەن پێداویستیه تایبه‌ته نادیاره‌كان، سه‌رۆكى كه‌مئه‌ندامانیش ده‌ڵێت، ده‌یانه‌وێت پڕۆژه‌كه له‌ئاستى هه‌رێم فراوان ببێت.
خاوه‌ن پێداویستییه تایبه‌ته دیاره‌كان، هه‌موو ئه‌و كه‌سانه ده‌گرێته‌وه كه حاڵه‌تى كه‌مئه‌ندامى یان نه‌خۆشییه‌كى نادیاریان هه‌یه و به‌رووخسار هه‌ستیان پێناكرێت و هیچ كه‌سێك به‌و حاڵه‌ته‌یان نازانێت.
گوڵه‌به‌ڕۆژه، پڕۆژه‌یه‌كی نێوده‌وڵه‌تییه، له نزیكه‌ى 100 وڵات جێبه‌جێ ده‌كرێت، ئامانجى ناساندنى ئه‌و حاڵه‌تانه‌یه به‌شێوه‌یه‌ك له رووه مرۆییه‌كه‌وه رێزى لێبندرێت و له‌ناو كۆمه‌ڵگه‌ش وه‌ك كه‌سێكی ئاسایی بناسرێت.
مه‌ریوان وه‌هبی، سه‌رۆكى لقی هه‌ڵه‌بجه‌ى كۆمه‌ڵه‌ى كه‌مئه‌ندامان، به 964ـى وت، دواى به‌شداریكردنیان له كۆنفڕانسێكی نێوده‌وڵه‌تى تایبه‌ت به چاره‌سه‌رى كێشه‌ى خاوه‌ن پێداویستییه تایبه‌ته‌كان له وڵاتى نه‌مسا، بیرۆكه‌ى ئه‌م پڕۆژه‌یه‌یان وه‌رگرتووه.
وتیشی “له‌رێگه‌ى ئه‌م پڕۆژه‌یه خاوه‌ن پێداویستییه نادیاره‌كان لۆگۆى تایبه‌تى گوڵه‌به‌ڕۆژه وه‌رده‌گرن بۆئه‌وه‌ى له‌هه‌ر شوێنێك ببیندرێت له‌لایه‌ن كۆمه‌ڵگاوه بناسرێته‌وه”.
به‌قسه‌ى مه‌ریوان، له هه‌ر شه‌ش كه‌س له جیهاندا یه‌ك كه‌س خاوه‌ن پێداویستى تایبه‌تى نادیاره.
له پێناسه‌ى لۆگۆى پڕۆه‌كه‌ش مه‌ریوان ده‌ڵێت، گوڵه‌به‌ڕۆژه به‌هۆى رۆژه‌وه ده‌ژێت و گه‌شه ده‌كات، بۆ پڕۆژه‌كه‌ش كه‌سی خاوه‌نى پێداویستى تایبه‌تى نادیار گوڵه‌كه‌یه و كۆمه‌ڵگاش ده‌بێته رۆژ بۆ ئه‌و گوڵه‌كه.
باسى له‌وه‌شكرد كه ئامانجیانه پڕۆژه‌كه به‌ته‌نیا له هه‌ڵه‌بجه نه‌بێت و بۆته‌واوى شارو شارۆچكه‌كانى هه‌رێمی كوردستان و ته‌نانه‌ت عێراقیش بڵاوببێته‌وه.
سه‌باره‌ت به چالاكییه‌كانى پڕۆژه‌كه، به‌پێویستى ده‌زانن سه‌ره‌تا ناساندێك بۆ پڕۆژه‌كه بۆ ته‌واوى چین و توێژه‌كان بكرێت و دواتریش له‌رێگه‌ى هه‌ڵمه‌تى جیاجیاوه هۆشیارى و زانیاری بدرێته هاوڵاتیان كه چۆن مامه‌ڵه و هه‌لسوكه‌وت له‌گه‌ڵ كه‌سانى نادیارى خاوه‌ن پێداویستى تایبه‌ت، بكه‌ن.