محەمەد شیاع سودانی، سەرۆک وەزیرانی عێراق
سەرۆکوەزیرانی عێراق سەردانی هەولێر دەکات؟
964+
ئەمڕۆ
بڕیارە ئەمڕۆ پێنجشەممە، لە چیای کۆڕەک بۆنەیەکی تایبەت بە نەورۆز رێکبخرێت، چەند سەرچاوەیەکیش باس لەوە دەکەن کە سەرۆکوەزیرانی عێراق دێتە هەولێر و دواتر بەشداری لەو بۆنەیەدا دەکات، بەڵام تاوەکو ئێستا هیچ سەرچاوەیەکی فەرمی سەردانەکەی سودانی پشتراستنەکردووەتەوە.
ئەمڕۆ پێنجشەممە 21.3.2024، سەرچاوەیەک بە 964ـی راگەیاند، سودانی لەسەر بانگهێشتی سەرۆکی حکومەتی هەرێمی کوردستان دێتە هەولێر و لە چیای کۆڕەک ئامادەی ئێوارەخوانێک دەبێت، کە لەلایەن سەرۆکی حکومەتی هەرێمی کوردستانەوە بۆ ژمارەیەک لە بەرپرسانی حکومەتی عێراق و باڵیۆزان و کونسوڵی وڵاتان ئامادەکراوە.
بڕیارە بەر لە ئێوارە خوانەکە، سودانی لەگەڵ مەسرور بارزانی، سەرۆکوەزیرانی هەرێمی کوردستان کۆببێتەوە و چەند پرسێکی تایبەت بە کێشە هەڵپەسێردراوەکانی و پرسی دارایی تاوتوێ بکەن، سەرچاوەکە وای وت.
پێشنیوەڕۆی ئەمڕۆ پێنجشەممە، 21.3.2024 و یهكهم رۆژی نهورۆزی 2724ی كوردی، محەممەد شیاع سودانی، سەرۆکوەزیرانی عێراق بە بۆنەی جەژنی نەورۆزەوە پیرۆزبایی لە گەلی کوردستان و تەواوی گەلی عێراق کرد و جەختی لەوە کردەوە کە حکومەت بەردەوام دەبێت لە کارکردن و بنیاتنانەوە و چەسپاندنی هەنگاوەکان بۆ گەیشتن بە خواست و ئامانجە هاوبەشەکانی عێراقییەکان.
سەرۆک وهزیرانی عێراق وتیشی: بەبۆنەی جەژنی نەورۆزەوە، پیرۆزبایی دڵسۆزانە ئاراستەی گەلی کوردی ئازیزمان لە هەرێمی کوردستانی عێراق و هەموو گهلی عێراقی بهشهرهف دهكهم، که هیوا و خۆشی دەهێنێت و هیوای سبەینێیەکی گەش پێشان دهدات.
تێبینی: ئەم هەواڵە نوێکراوەتەوە لە کاتژمێر 5:42 خولەکی پاش نیوەڕۆ
