ژنێک بەستەڵەکى ترسى شکاند
بەشداربوویەکى راپەڕین چیرۆکى رۆژانى پێش راپەڕینى هەولێر دەگێڕێتەوە
964+
شۆڕش عەبدوڵا- هەولێر
بەشداربوویەکى راپەڕینەکەى هەولێر، چیرۆکى رۆژانى پێش راپەڕینەکەى 11ـى ئادار دەگێڕێتەوە و باسى ژنێک دەکات کە چۆن دەستى بە هوتافکێشان کردووە و بەستەڵەکى ترسى شکاندووە.
حەمە عەباس، پێشمەرگەى دێرین و یەکێک لە بەشداربووانى راپەڕینەکەى 11ـى ئادارى 1991ـى هەولێر، باس لە رۆژانى پێش راپەڕین دەکات و دەڵێت: پێنج رۆژ پێش راپەڕینەکەى 11ـى ئادار، لە رۆژى 6ـى ئادارەوە جموجۆڵ و خۆپیشاندان لە نزیک چایخانەى کرێکاران و کۆڵانى توتنفرۆشان دەستیپێکرد، بەڵام سەرکوت کرا.
ئەو باس لەوە دەکات، ئەو رۆژە ژنێک دەستى بە هوتافکێشان لە دژى رژێم کرد و بە دەنگێکى بەرزەوە هاوارى دەکرد و دەیگوت،” بژى هێزى پێشمەرگە، سەدام نزیکى مەرگە”، بەوهۆیەوە ژمارەیەک خەڵک کۆبوونەوە و خۆپیشاندان دەستیپێکرد.
حەمە عەباس کە نصوسەرە و بەرهەمى چاپکراوى هەیەو پێى وایە، ئەو رۆژە بەستەڵەکى ترس شکا و ئینزیباتخانە دەرگاى داخست، لە جیاتى خەڵک بترسێت لەوان، ئەوان لە خەڵک ترسان و هاوکێشەکە پێچەوانە بووەوە.
پێداچوونەوە: وریا فەتاح