پارکی هەواری شار لە سلێمانی بۆ بەهار ئامادەیە

پێشەوا محەمەد

جگە لە هەندێ ئیشی وردە، بە وتەی بەڕێوەبەری پارکی هەواری شار لە سلێمانی، تەواوی کاری نۆژەنکردنەوە و پاککردنەوەی پارکەکە کۆتایی هاتووە و بۆ بەهار بۆ پێشوازی گەشتیاران ئامادەیە.

چوار سێتی نوێی تەوالێت بۆ پارکەکە دروستکراون و بەوەی خۆیەوە ئێستا 10 سێتی دوو تەوالێتیی تێدایە.

فەرەیدون عومەر، بەڕێوەبەری پارکی هەواری شار بە 964ـی راگەیاند، بە گشتی نۆژەنکردنەوە و دروستکردنی تەوالێت و دروستکردنی هەندێ شۆستەی نوێ تەواو کراون و هەندێکیان هەندێ ئیشی زۆر کەم و وردیان ماوە.

وتیشی، “تەواوی حەوزەکان و ئاوەڕۆکان و شەلالەکان پاککراونەوە و دەست بە رشاندنی دژە گیای بەهارە کراوە و ئەو دارانەی پێویستیان بە رێککردنەوە و گواستنەوە هەبوو هەمووی بۆ کراوە.”

پاركی هەواری شار، لە سەر رووبەری چوار هەزار و 400 دۆنم زەوی دروست كراوە، دەكەوێتە باكووری رۆژئاوای شاری سلێمانی.

“پارکەکە 10 هەزار نەمامی نوێی تێدا رووێندراوە و پەرژینەکەشی چاککراوەتەوە و بۆ بەهار بەتەواوی پارکەکە ئامادە دەبێت تا هاوڵاتیان کاتێکی خۆشی تێدا بەسەربەرن”، ئەوەش قسەی بەڕێوەبەری پارکی هەواری شارە.