خۆپیشاندانی قەڵادزێ. وێنە :964
بایکۆت بەردەوامە
هەر بەم شەوە مامۆستایانى ناڕازى پشدەر وەڵامى پەروەردەیان دایەوە
964+
وریا فەتاح
دەستەى سەرپەرشتیى مامۆستایانى ناڕازى لە پشدەر، وەڵامى پەروەردەى پشدەریان دایەوە و دەڵێن، بایکۆت بەردەوامە و داواش لە مامۆستایان دەکەن بایکۆت نەشکێنن.
دواى ئەوەى ئێوارەى ئەمڕۆ، بەڕێوەبەرایەتیى پەروەردەى پشدەر، داواى لە مامۆستایان و خوێندکاران کرد، سبەینێ سێشەممە دەوام ئاساییە و بگەڕێنەوە هۆڵەکانى خوێندن، بەم درەنگى شەوە دەستەى سەرپەرشتیى مامۆستایانى ناڕازى وەڵامى پەروەردەیان دایەوە و دەڵێن: بایکۆت ناشکێنین.
لە راگەیەندراوەکەى دەستەى سەرپەرشتى مامۆستایانى ناڕازیى پشدەردا هاتووە، “داواکارین هیچ مامۆستایەک نەچێتە ژێر کاریگەریی ئەو قسە و بەڵێنانەی پەروەردەکان پێتانی دەدەن، هەروەها دەبێت ئێمە لەوە هۆشیارتربین و نەکەوینە ژێر کاریگەریی هەندێک پڕوپاگەندە، کە گوایە تەنیا پشدەر ماوە بایکۆت بشکێنێت”.
دەستەى مامۆستایانى پشدەر جەخت دەکەنەوە، بایکۆت بەردەوامە و رۆژى چوارشەممەش لە شەقام خۆپیشاندان دەکەن.
