لە عێراق زیاتر لە 210 هەزار هاوڵاتى مەدەنى کوژراون

وریا فەتاح

بەگوێرەی داتایەک لەماوەی 20 ساڵی رابردوودا، زیاتر لە 210 هەزار هاوڵاتى مەدەنى لە عێراق کوژراون کە زۆرترینیان لە 2006 بووە و کەمترینیان لە 2023 بووە.

کۆمپانیاى ستاتیستاى ئەڵمانى تایبەت بە داتا و ئامار ئاشکراى کردووە، لە ماوەى 20 ساڵى رابردوودا، واتا لەگەڵ دەستپێکى پڕۆسەى ئازادى عێراق لە ساڵى 2003 تا کۆتایى 2023، 210 هەزار و 449 هاوڵاتى مەدەنى لە عێراق، بەهۆى شەڕو ململانێ و تەقینەوەکان کوژراون.

بەپێى داتاکەى ستاتیستا، ساڵى 2006 خراپترین ساڵ بووە بۆ هاوڵاتیانى مەدەنى لە عێراق کە تێیدا 29 هەزار و 526 کەس کوژراون، بەڵام 2023 کەمترین رێژەى کوژرانى هاوڵاتیانى مەدەنى تۆمارکراوە کە تەنیا 467 هاوڵاتى کوژراون.

ئامارەکە تەنیا بۆ هاوڵاتیانى مەدەنییە، واتا ئەو چەکدار و سەربازانە ناگرێتەوە کە لەشەڕ و رووبەڕووبونەوەکان کوژراون، هاوکات ئەو هاوڵاتییە مەدەنییانەش ناگرێتەوە کە بە مردنى ئاسایى مردون، تەنیا بۆ ئەوانەیە کە بەهۆى لێکەوتەکانى شەڕ و تەقینەوە و کردە چەکدارییەکانەوە کوژراون.

پڕۆسەى ئازادى عێراق لە مانگی ئازاری ساڵی 2003 دەستیپێکرد و دوای هەشت ساڵ، لە کانوونی دووەمی 2011، ئەمریکا بە فەرمی کۆتایی هاتنی شەڕی عێراقی راگەیاند.

​