سێ کەسیش بریندارن
لە رووداوێکی هاتوچۆدا چوار کەس گیانیان لەدەستدا
+964
سیروان خورشید- دوزخورماتوو
لە رووداوێکی سەختی هاتوچۆدا لەسەر رێگای سەڵاحەدین-خورماتوو چوار کەس گیانیان لەدستدا و سێ کەسی دیکە برینداربوون.
پێش نیوەڕۆی ئەمڕۆ پێنجشەممە 25.1.2024 رووداوێکی سەختی هاتوچۆ لەنێوان دوو ئۆتۆمبێل لە جۆرەکانی فۆرت و ئۆپڵ ڤێکترا روویداوە و بەهۆیەوە چوار کەس گیانیان لەدەستداوە و سێ کەسی دیکەش بریندارن.
964 چەند جارێک پەیوەندی بە بەشی هاتوچۆی سەڵاحەدینەوە کرد، بەڵام بەردەست نەبوون.
سەرچاوەیەکی نزیک رووداوەکە بە964ی وت، جۆری رووداوەکە پێکدادانی خێرای نێوان هەردوو ئۆتۆمبێلەکە بووە و ئەو شوێنەی کە رووداوەکەی تێیدا روویداوە شەقامەکە بەرز و نزمیی زۆری تێدایە، شۆفێری ئۆپڵەکە لە نزمییەوە کاتێ گەشتووەتە سەرەوە، ئۆتۆمبێلی فۆرتەکەی نەبینیوە و بە تیژڕەوییەکی زۆرەوە پێکدادان لەنێوانیاندا روویداووە.
ئەو سەرچاوەیە وتیشی، سەرجەم سەرنشینانی نێو ئۆتۆمبێلی ئۆپڵەکە دەستبەجێ گیانیان لەدەستداوە، کە ژمارەیان چوار سەرنشین بوون بە شۆفێرەکەشەوە. سێ کەسی دیکەش لەنێو فۆرتەکە برینداربوون و سەرجەمیان رەوانەی نەخوشخانەکراون.
بریندارەکان بە ئۆتۆمبێلی هاوڵاتیان رەوانەی نەخۆشخانەکران، پۆلیسی هاتوچۆ نەگەشتبووە شوێنی رووداوکە.
پێداچوونەوە: موحسین عومەر
