وێنەی تۆمەتبارەکە لە لایەن پۆلیسی سلێمانی بڵاوکراوەتەوە
پۆلیس: کوڕێک دەستگیرکرا کە یەک دەفتەر دۆلاری لە کچێک سەندووە
964+
شاڵاو عەلی – سلێمانی
پۆلیسی سلێمانی کوڕێکی دەستگیرکردووە بە تۆمەتی ئەوەی قۆڵی کچێکی بڕیوە، گوایە ئەو کوڕە 15 ملیۆن و 500 هەزار دیناری لەو کچە سەندووە.
دەوترێت ئەو دووانە لە رێگەی تۆڕەکانی کۆمەڵایەتی یەکیان ناسیوە.
سەرکەوت ئەحمەد، وتەبێژی پۆلیسی سلێمانی بە 964+ی وت، دوای ئەوەی کچێک لە بنکەی پۆلیسی رزگاری سلیمانی سکاڵای لەسەر کەسێک تۆمارکردوە و وتوویەتی کە بڕە پارەیەکی زۆری بە فێڵ لێسەندراوە، هێزەکانیان دەستیان کردووە بە لێکۆڵینەوە.
ئەو وتەبێژە دەڵێت، لە ماوەی 24 کاتژمێردا توانیویانە بە هەماهەنگی پۆلیسی هەولێر تۆمەتبارەکە لە شاری هەولێر بدۆزنەوە و دەستگیری بکەن.
پۆلیس دەستی بەسەر بڕێک لە پارەکەشدا گرتووە.
سەرکەوت ئەحمەد دەڵێت، تۆمەتبارەکە ناوی (م، ف، ع)ە، لەدایکبوی 2003یە و دانیشتوی هەولێرە.
ئێستا ئەو تۆمەتبارە بەپێی مادەی 452ی یاسای سزادانی عیراقی راگیراوە و لێکۆڵینەوە لەگەڵیدا بەردەوامە.