چالاکییەکی وه‌رزشی بۆ منداڵانی عاموودا ئه‌نجامدرا

“با هه‌موو منداڵانی ئێمه‌ پێشبكه‌ون”

نووسینگه‌ی رۆژئاوا

به‌بۆنەی رۆژی جیهانیی منداڵانەوە، رێکخراوی بوهار چالاکییەکی وەرزشی و سه‌رگه‌رمی لە هۆڵی وەرزشیی عاموودا رێکخست، بە بەشداریی منداڵان، دایكی منداڵێكیش ده‌ڵێت با زارۆكی ئێمه‌ پێشبكه‌ون و ناخۆشییان زۆر بینیوه‌.

له‌ باره‌ی چالاكییه‌كه‌وه‌ ئارین قجۆ، سەرۆکی تیمی عاموودا له‌ رێكخراوی بوهار به‌ 964ی وت، منداڵانیان كرد به‌ دوو تیم و یارییه‌كی تۆپی باله‌یان بۆ رێكخستن.

وتیشی، ئامانجیان لە چالاکییه‌كه‌ ئەوەیە، رۆحی هاوکاری و بەشداریکردن لە نێوان منداڵاندا بەهێز بکەین، هەروەها جەخت لە مافی هەموو منداڵێک ده‌کەنەوە بۆ یاریکردن و بەشداریکردن لە ژینگەیەکی سەلامەت و پاڵپشتیكراودا.

هه‌روه‌ها منه‌وه‌ر خه‌ڵه‌ف كه‌ دایكی منداڵێكی به‌شداربووی چالاكییه‌كه‌یه‌ و خۆیشی سه‌رۆكی كۆمه‌ڵه‌ی شه‌هید جومعه‌یه‌، به‌ 964ی وت، “با منداڵانی ئێمه‌ پێشبكه‌ون، چونكه‌ ناخۆشیی زۆریان بینیوه‌، بۆیه‌ ده‌ستخۆشی له‌ رێكخراوی بوهار ده‌كه‌م كارێكی زۆر باشیان كردووه‌”.

پێداچوونه‌وه‌: ئه‌رسه‌لان عه‌بدوڵا