لابردنی یەکێک لە زیادەڕۆییەکان - وێنە: شارەوانیی رانییە
دوو حاڵەت بوون
شارەوانیی رانیە زیادەڕۆییەکانی ساڵی نوێی لابرد
964+
پێشەوا محەمەد
لە ناو شاری رانیە دوو کەس پشووەکانی سەری ساڵیان بە دەرفەت زانیبوو و زیادەڕۆییان کردبووە سەر موڵکی گشتی، بەڵام شارەوانیی شارەکە پێیزانیوە و لایبردوون.
زیادەڕۆییەکان دوکانێک بووە لەگەڵ بەشێکی خانوویەک، کە لەسەر موڵکی گشتی دروستکرابوون.
بەرهەم رەسوڵ، سەرۆکی شارەوانیی رانیە بە 964ـی راگەیاند، لە ساڵی نوێدا ئەو دوو حاڵەتەی زیادەڕۆیی هەبوو و لابران.
وتیشی، “بە گشتی لەناو رانیە زیادەڕۆییکردن کەمە و ئێمەش چاومان کراوەیە بۆ لابردنیان لە ئەگەری روودانی هەر زیادەڕۆییەکدا”.
شاری رانیە 53 گەڕەکی هەیە و ژمارەی دانیشتوانەکەی 125 هەزار کەسە.
“چاوپۆشی لە هیچ کەسێک ناکەین و هەرکەسێکیش زیادەڕۆیی بکات زیادەڕۆییەکەی لادەبەین”، ئەوەش قسەی سەرۆکی شارەوانیی رانیەیە.
بە وتەی ناوبراو شاری رانیە لە فراوانبووندایە و بەردەوام گەڕەکی نوێ لە دروستبووندان.
