وەزارەتی کار و کاروباری کۆمەڵایەتی - وێنە: وەزارەتی کار و راوباری کۆمەڵایەتی لە فەیسبووک
بۆ هاوکاریی ژنانی داڵدەدراوە
وەزارەتی کار و رێکخراوی Intersos گرێبەستێکیان واژۆ کرد
964+
پێشەوا محەمەد
وەزارەتی کار و کاروباری کۆمەڵایەتی و رێکخراوی Intersosـی ئیتاڵی گرێبەستێکیان واژۆکرد بۆ هاوکاری و یارمەتیدانی ژنانی ناو شێڵتەرەکان.
رێکخراوەکە مانگی حەوتی ساڵی رابردوو سەردانی وەزارەتی کار و کاروباری کۆمەڵایەتی کردووە و دوێنێ چوارشەممە 10.1.2024 گرێبەستی کارکردنیان واژۆ کردووە.
“کاری ئەو رێکخراوە لە بوواری گەیاندنی خزمەتگوزاریی تەندروستی و رێکخستنی لایەنی یاسایی کەیسی ژنانی داڵدەدراو و هاوکاریکردنیانە بۆ دابینکردنی پارێزەر بۆ ئەو ژنانەی پارێزەریان نییە”، ئەوە قسەی زەکییە ساڵح، بریکاری وەزارەتی کار و کاروباری کۆمەڵایەتییە بۆ 964.
دەشڵێت، وەزارەتی کار ساڵانە هاوکاریی ئەو رێکخراوە و چەندان رێکخراوی دیکەش بۆ هاوکاریی زیندانیان و ژنانی داڵدەدراو وەردەگرێت و هەموو ئاسانکارییەکیان بۆ دەکات.
بە پێی ئاماری وەزارەتی کار و کاروباری کۆمەڵایەتی، لە شێڵتەرەکانی هەولێر، سلێمانی، دهۆک و گەرمیان 65 ژنی داڵدەدراو بوونیان هەیە.
رێکخراوی Intersos ساڵی 1992 دامەزراوە و سەرنجی لەسەر تەندروستی، باری دەرونی و خۆراکە بۆ ژنان بە تایبەت لەو شوێنانەی جەنگ تێیاندا روویداوە.
