ژمارەیەک کۆڵبەر لە سنوورێکی رۆژهەڵاتدا وێنە: ئاژانسەکان
منداڵێکی نۆ ساڵانی هەیە
کۆڵبەرێک لە سنووری بانە کوژرا
964+
پێشەوا محەمەد
کۆڵبەرێکی خەڵکی شاری سەقزی رۆژهەڵاتی کوردستان لە سنووری هەنگەژاڵی بانە کوژرا و رێکخراوی هەنگاو دەڵێت، “بە تەقەی راستەوخۆی هێزە ئەمنییەکان بەرکەوتووە”.
رێکخراوەکە، کە چاودیریی رەوشی مافی مرۆڤی رۆژهەڵاتی کوردستان دەکات ئەمڕۆ شەممە 30.12.2023 بڵاوی کردووەتەوە، ئەو کۆڵبەرە ناوی ئەحمەد سادقییە و تەمەنی 32 ساڵ بووە و باوکی منداڵێکی نۆ ساڵانە.
پێشتر رێکخراوی هەنگاو رایگەیاندبوو، لە سەرەتای ساڵی 2023 تا ئێستا لانیکەم 311 کۆڵبەر لە سنوورەکانی رۆژهەڵاتی کوردستان کوژراون و بریندار بوون، کە زۆرینەی رەهایان بە تەقەی هێزەکانی فەوجە سنوورییەکان پێکراون.
ئەوەشی ئاشکرا کردووە، تۆمارکردنی ئەو ئامارە لەماوەی دەیەی رابردوودا بێ وێنە بووە و بۆ یەکەمجارە ژمارەی کوژران و بریندارەکانی کۆڵبەران، لە ماوەی یەک ساڵدا 300 حاڵەتی تێپەڕاندووە، بە تایبەت لە ناوچە سنوورییەکانی بانە و نەوسود.
کۆڵبەری کارێکی تاقتپڕوکێنە و دانیشتوانی رۆژهەڵاتی کوردستان بۆ بەدەستهێنانی بژێویی ژیانیان پەنای بۆ دەبەن.
