هۆشداریی گرنگی بانکی جیهان بۆ مووچەخۆران؛ کارتەکانتان بە کەس مەدەن

ئەحمەد مستەفا

بانکی جیهان، بەشداری پڕۆژەی هەژماری من، ئاگادارکردنەوەیەکی ئاراستەی فەرمانبەران و مووچەخۆران کردووە و داوای لێکردوون بە وردی ئاگاداری زانیارییە بانکییەکانیان بن.

بانکەکە لە راگەیەندراوێکدا دەڵێ، کارتی بانکی، ژمارەی نهێنی PIN و کۆدی پشتڕاستکردنەوەی OTP، زانیاریی تایبەتی خاوەن هەژمارەکەن و نابێت بە هیچ کەسێک بدرێن، تەنانەت ئەگەر کەسەکە ناسیاو یان خۆی بە کارمەندی بانک بناسێنێت.

هەروەها باسی لەوەکردووە، تەنیا خاوەن کارت مافی بەکارهێنانی کارتەکەی هەیە و بانک هەرگیز داوای ژمارەی نهێنی یان کۆدی OTP ناکات.

بانکەکە داواشی کردووە ئەگەر کەسێک داوای ئەم زانیارییانەی لێکردن، دەستبەجێ ئاگاداری بانک بکەنەوە.