تیمەکانی شارەوانیی سلێمانی لە پشوودا نین

پێشەوا محەمەد

تیمەکانی شارەوانیی سلێمانی لە رۆژانی پشووی سەری ساڵدا لە ئەرکدان و سەرۆکی یەکێک لە لیژنەکان دەڵێت، وەک رۆژانی تر کاردەکەن.

شارەوانیی سلێمانی خاوەنی لیژنەکانی زیادەڕۆیی، خۆڵ و خاشاک و نۆژەنکردنەوەی شەقام و کۆڵان و رێگاوبانەکانە.

زەردەشت رەفیق، وتەبێژی شارەوانیی سلێمانی بە 964ـی راگەیاند، سەرجەم لیژنەکانیان وەک رۆژانی پێش پشوو لە ئەرکدان و کارەکانیان ئەنجام دەدەن.

وتیشی، “لیژنەکان هەر کارێکی نایاسایی ببینن، یان کارە ئاساییەکانی لیژنەکە کە ئەرکیانە لە رۆژانی پشوودا ئەنجامی دەدەن و بەدواداچوون بۆ سکاڵای هاوڵاتیان دەکەن”.

پلانی شارەوانیی سلێمانی بۆ ساڵی نوێ چی دەبێت؟ ئەوە پرسیارێک بوو 964 لە وتەبێژی شارەوانییەکەی کرد، ئەویش لە وەڵامدا وتی، “سکاڵایەکی زۆرمان لە لایەن هاوڵاتیان و شۆفێرانەوە بۆ دێت کە شەقام شۆستەکان زیادەڕۆییان زۆر کراوەتەسەر و تەسک کراونەتەوە و شتیان لەسەر داندراوە، هەوڵ دەدەین ئەو زیادەڕۆییانە نەهێڵین”.