کەنداوی 25 سواڵکەری شەقامەکانی بەسرەی نەهێشت

 +964

لەگەڵ گەیشتنی هەڵبژاردە بەشدارەکانی پاڵەوانیەتی کەنداوی 25، ژمارەیەکی زۆری سواڵکەریش خۆیان خزاندە شارەکە، بەڵام تۆمارێکی دەنگی پارێزگار، شارەکەی لە سواڵکەران پاککردەوە.

ئەسعەد عێدانی، پاریزگاری بەسڕە لە تۆمارێکی دەنگیدا فەرمانی بە هێزە ئەمنییەکانی شارەکە داوە کە رێگە بە سواڵکەرەکان نەدەن لە چوارڕیانەکانی شارەکە هەینی رابردوو، جیاواز لە هەینییەکانی دیکە بە ئاشکرا هەستت دەکرد بڕیارەکەی پارێزگار جێبەجێکراوەو چوارڕیانەکانی شارەکە خاڵی بوون لە سواڵکەر ببینرێن .

بڕیارە لە شەشی ئەم مانگە بە فەرمی پاڵەوانیەتی کەنداوی عەرەبی 25 بە بەشداری هەشت هەڵبژاردە ئەنجام بدرێت، یارییەکانیش تا 19 ئەم مانگە دەخایەنێت.

ئەسعەد عێدانی، پارێزگاری بەسرە لە تۆمارە دەنگییەکەدا ئاماژەی بەوەشدا لەگەڵ نزیکبوونەوەی پاڵەوانێتی کەنداوی 25، زۆربەی سواڵکەرەکان لە دەرەوەی شاری بەسرەوە هاتوون.

لەم چەند ڕۆژەی دواییدا دیاردەی سواڵکردن بەشێوەیەکی بەرچاو لە چوارڕیانەکانی بەسڕە رووی لەزیادبوون کردووە، زۆربەی ئەو سواڵکەرانەش لە پارێزگاکانی دیکەوە هاتوونەتە بەسڕەو ئەمەش رەنگدانەوەی بەسەر چوارڕیانەکان هەبووەو پڕی کردوون لە سواڵکەر، ئەمەش بە قسەی بەرپرسانی شارەکە کاریگەری لەسەر ناوبانگی پاڵەوانیەتی کەنداوی 25 دروست دەکات.

یەکەم پاڵەوانیەتی کەنداو، ساڵی 1970 لە وڵاتی بەحرێن ئەنجامدرا، ساڵی 1979 بۆ یەکەمجار عێراق میوانداریەتی پاڵەوانیەتییەکەی کرد.