دەریاچەکەی پارکی ئازادی بۆ گلدانەوەی باراناو پاکدەکرێتەوە

ژووری هەواڵ

حەوزە فراوانەکەی پارکی ئازادی وشکی کردووە، بەڵام شارەوانیی سلێمانی دەیەوێت بیبوژێنێتەوە، بۆ ئەو مەبەستە دەستیکردووە بە پاککردنەوەی حەوزەکە و خۆڵ خاشاکەکانی فڕێدەدات.

ئەمڕۆ یەکشەممە 26.11.2023، زەردەشت رەفیق، بەڕێوەبەری شارەوانیی سلێمانی بە 964ـی راگەیاند، دەریاچەی دروستکراوی دووەمی ناو پارکی ئازادی وەک ئامادەکاری بۆ گلدانەوەی ئاوی کارێز و باراناوی وەرزی پایز و زستان، پاکدەکرێتەوە.

وتیشی، پاککردنەوەی دەریاچەکە، یەکێکە لە قۆناغەکانی نۆژەنکردنەوەی پارکی ئازادی، کە بە هەشت قۆناغ جێبەجێ دەکرێت.

بە پێی زانیارییەکانی 964، تەواوبوونی نۆژەنکردنەوەی پارکی ئازادی ساڵێکی دیکەی پێویست دەبێت و لە دەستپێکی نۆژەنکردنەوەکەدا دوو ملیار دیناری بۆ تەرخانکرا.

پارکی ئازادی لە سلێمانی رووبەرەکەی 176 دۆنمە، بە هەشت قۆناغ نۆژەن دەکرێتەوە و دوو ملیار دیناری بۆ دابین کراوە.

لە پارکی ئازادیدا دوو دەریاچە هەیە، بە مەبەستی جوانی و ئاودێری بەکاردێن، بەڵام هەردووکیان بە تەواوەتی وشکیان کردووە.