964+
پارێزەری چەند دۆسیەیەکە
لە هەولێر تەقە لە پارێزەرێک کرا
964+
شۆڕش هەرکی – هەولێر
کەمێک لەمەوبەر لە هەولێر تەقە لە پارێزەرێک کرا و بریندارە، بەگوێرەی زانیاریەکان پارێزەرەکە خەڵکی رۆژهەڵاتی کوردستانە.
موقەدەم ئەردەلان وتەبێژی ئاسایشی هەولێر بۆ 964 وتی، “بەڵێ راستە تەقە لەو پارێزەرە کراوە و بریندار کراوە، بەڵام هێشتا تەقەکەرەکە دەستگیرنەکراوە و لێکۆڵینەوەکان بەردەوامن”.
بەپێی زانیاریەکانی 964 ئەو پارێزەرە ناوی سوهراب رەحمەتیە، خەڵکی شاری بۆکانە، ئەندامی حزبی دیموکراتی کوردستانە و ئەندامی سەندیکای پارێزەرانی کوردستانە.
ئەیاد کاکەیی سەرۆکی لقی هەولێری سەندیکای پارێزەرانی کوردستان بۆ 964 وتی، “رووداوەکە ئەمڕۆ کاتژمێر 6:00ی ئێوارە بووە، لەبەردەم ماڵەکەی لە شووقەکانی هانا سیتی تەقەی لێکراوە و ئێستا لەژێر نەشتەرگەرییە”.
بەوتەی ئەیاد کاکەیی، “پارێزەر سوهراب رەحمەتی پارێزەری کەیسی رووداوی تەقینەوەکەی شەوی یەڵدا و کەیسی تیرۆرکردنی قادر قادری بووە”.
کەسێکی نزیکی سوهراب رەحمەتی قسەی بۆ 964 کردووە دەڵێت، گوللەیەک بەر سکی کەوتووە و لەژێر نەشتەرگەرییە.
