964  هۆكارى گرانبونى مریشك و واده‌ى هەرزانبوونه‌وه‌ی ئاشکرا دەکات

فه‌رهاد حه‌سه‌ن

ماوه‌یه‌كه‌ نرخى مریشك له‌ بازاڕه‌كانى هه‌رێمی كوردستان به‌رزبووه‌ته‌وه‌، به‌ڵام به‌قسه‌ى پسپۆڕان، گرانبوونه‌كه‌ى هێنده‌ ناخایه‌نێت و وه‌ك خۆى لێدێته‌وه‌.

نزیكه‌ى هەفتەیەكه‌، نرخی یه‌ك كیلۆ مریشکی زیندوو لە کێڵگە پەلەوەرییەکان بە سێ هەزار و 400 دینار دەفرۆشرێت، كه‌ ده‌گاته‌ بازاڕیش ئه‌و نرخه‌ بۆ چوار هەزار و 200 دینار بەرزده‌بێتەوە.

نازم عه‌بدوڵا، سه‌رۆكى كۆمه‌ڵه‌ى كێڵگه‌ په‌له‌وه‌رییه‌كان، له‌ رێگه‌ى 964 ـه‌وه‌ دڵنیایی ده‌دات، به‌رزبوونه‌وه‌ى نرخى ئێستاى مریشك كاتییه‌ و هێنده‌ى پێناچێت هه‌رزان ده‌بێته‌وه‌.

وتیشی “ئێستا له‌ زۆربه‌ى كێڵگه‌كان ژماره‌یه‌كی زۆر له‌ جوجكى ته‌مه‌ن 10 ، 20 و 30 رۆژه‌ بوونیان هه‌یه‌ و كه‌متر له‌ دوو هه‌فته‌ى دیكه‌ ده‌خرێنه‌ بازاڕاوه‌ و نرخه‌كه‌ هه‌رزان ده‌بێته‌وه‌”.

له‌ باره‌ى هۆكارى به‌رزبوونه‌وه‌ى ئێستاى ئه‌و نرخه‌ش، نازم عه‌بدوڵا ئه‌وه‌ى بیرهێنایه‌وه‌،  سێ مانگ له‌مه‌وبه‌ر نزیكه‌ى 15 ملیۆن مریشك به‌هۆى نه‌خۆشییه‌وه‌ مرداربوونه‌وه‌ و ده‌شڵێت “ئه‌مه‌ هۆكارێكی سه‌ره‌كى گرانبوونى نرخه‌كه‌یه‌”.

باس له‌وه‌ش ده‌كات، هەناردەكردنى مریشكى زیندوو له‌ هه‌رێمی كوردستانه‌وه‌ بۆ ناوچه‌كانى ناوه‌ڕاست و خوارووى عێراقیش هۆكارێكی دیكه‌یه‌.

به‌ پێی ئه‌و ئاماره‌ى 964 له‌ كۆمه‌ڵه‌ى كێڵگه‌ په‌له‌وه‌رییه‌كان ده‌ستیكه‌وتووه‌، له‌ هه‌رێمی كوردستان ساڵانه‌ هه‌ر یه‌ك كه‌س پێویستى به‌ 24 كیلۆ مریشك هه‌یه‌.