دوو کەس لەسەر بیرهەڵکەندن دەستگیر کران

هاوبەش ئەبوبەکر

لە گوندێکی تانجەرۆی سلێمانی، دوو کەس لەسەر هەڵکەندنی بیر بە شێوەیەکی نایاسایی، دەستگیر کران.

ئەمڕۆ چوارشەممە 18.10.2023، پۆلیسی دارستان و ژینگەی سلێمانی رایگەیاند، بنکەی پۆلیسی دارستان و ژینگەی تانجەرۆ لە دەرچوونێکی مەیدانیدا بۆ گوندى ژاڵەسەروو، دوو کەس دەستگیر کران کە سەرقاڵی هەڵکەندنی بیر بوون بە شێوەیەکی نایاسایی.

پۆلیسی دارستان و ژینگەی تانجەرۆ دەستی بەسەر ئەو ئامێرەدا گرتووە، کە لەلایەن ئەو دوو کەسەوە بۆ هەڵکەندنی بیر بەکارهاتووە و لە جۆری “بەرینەیە”.

ئێستا پەڕاوی لێکۆڵینەوە بۆ ئەو کەسانە رێکخراوە و رادەستی دادوەر کراوە بۆ رێکاری یاسایی.

ئەمساڵ لە سنوری پارێزگای سلێمانی زیاتر لە 55 کەس لەسەر هەڵکەندنی بیری نایاسایی دەستگیر کراون.