سەفین دزەیی بۆ +964؛ ئێران هیچ نامەیەکی ناڕەزایەتی نەگەیەنراوەتە فەرمانگەی پەیوەندییەکان

بۆڵتن؛ ئاگر لە پەیوەندییەکانی هەرێم و ئێران بەردەدات +964 فەرمان سادق بەرپرسانی حکومەتی هەرێمی کوردستان بە هەموو شێوەیەک رەتی دەکەنەوە لە هەرێمی کوردستانەوە چەک رەوانەی رۆژهەڵاتی کوردستان کرا بێت، ئەمەش لە کاتێکدایە راوێژكاری پێشووی ئاسایشی نیشتمانیی ئه‌مریكا دەڵێ لە کوردستانەوە چەک دەچێتە ئێران. سەفین دزەیی، بەرپرسی فەرمانگەی پەیوەندییەکانی دەرەوەی حکومەتی هەرێمی کوردستان بە +964ـی راگەیاند، ئەو قسەیەی جۆن بۆڵتن راوێژكاری پێشووی ئاسایشی نیشتمانیی ئه‌مریكا لەبارەی ئەوەی کە چەک لە هەرێمی کوردستانەوە دەچێتە رۆژهەڵاتی کوردستان، بە تەواوەتی رەت دەکەینەوە. ئەوەشی خستەڕوو کە هیچ کاتێک حکومەتی هەرێم رێگەی بەوە نەداوە خاکی هەرێمی کوردستان بووبێتە مایەی مەترسی بۆ سەر خاکی وڵاتانی دراوسێ، بەڵام “ئەوە مانای ئەوە نیە هێزەکانی لە ناوچە سنوورییەکان هەن وەک پەکەکە بە چاوپۆشی یان رەزامەندی هەرێمی کوردستان هێرش بکەنە سەر وڵاتانی دراوسێ، ئەو هێزانە پێش بوونی حکومەتی هەرێمی کوردستان لەو ناوچانە بوونیان هەبووە لە سەردەمی رژێمی پێشوو”. بۆیە حکومەتی هەرێمی کوردستان هیچ کات نەبووەتە هەڕەشە لەسەر ئاسایشی هیچ وڵاتێک. لەبارەی ئەوەی هێزەکانی رۆژهەڵات لەسەر خاکی هەرێمی کوردستان چەندە بەدەم داخوازی حکومەتی هەرێمەوە هاتوون لەوەی خاکی هەرێم بۆ هێرشکردنە سەر ئێران بەکار نەهێنن، سەفین دزەیی دەڵێ؛ لە رابردوودا گوێڕایەڵ بوون، ئێستاش لایەنی پەیوەندار لە حکومەتی هەرێم بۆچوونی حکومەتی هەرێمی کوردستانی گەیاندووەتە ئەو هێزانەو، چاوەڕێی ئەوەش لەو هێزانە دەکەین پابەند بن و نەبنە هۆکار بۆ ئەو گرژییانەی ئێستا هەیەو دەبێت رێز لە یاساکانی هەرێمی کوردستان بگرن، زیاتر وتی “کێشەی برا کوردکانمان لە ئێران پێوسیتە بە رێگەی دیالۆگ چارەسەر بکرێن نەک توندوتیژی”. ئەو قسانەی سەفین دزەیی، بەرپرسی فەرمانگەی پەیوەندییەکانی حکومەتی هەرێمی کوردستان لە کاتێکدایە دوێنێ شەممە ١٩ـی تشرینی دووەم، جۆن بۆڵتن راوێژكاری پێشووی ئاسایشی نیشتمانیی ئه‌مریكا، لە دیمانەیەکی لەگەڵ کەناڵی بی بی سی فارسی، دەڵێ ئەو چەکانەی کە خەڵک لە رۆژهەڵاتی کوردستان بە دەستیان گەیشتووە لە بارەگاکانی پەسیج یان لە کوردستانی عێراقەوە بە دەستیان گەیشتووە.

“چاوەڕێی ئەوەش لەو هێزانە دەکەین پابەند بن و نەبنە هۆکار بۆ ئەو گرژییانەی ئێستا هەیەو دەبێت رێز لە یاساکانی هەرێمی کوردستان بگرن”

ئەو لێدوانەی بۆڵتن بە خێرایی لە میدیای جیهانی و ئێران بڵاوبووەوەو، حکومەتی هەرێمی کوردستانی درەنگانی شەوی رابردوو هێنایە سەرخەت. حکومەتی هەرێمی کوردستان، لە راگەیێندراوێکدا دەڵێت؛ بە هیچ شێوەیەک رێگەمان نەداوە و رێگەش نادەین ئاسایشی وڵاتانی دراوسێ لە رێگەی هەرێمی کوردستانەوە تێکبدرێت و ئەمجۆرە هەواڵانە دوورن لە راستیەوە.

سەفین دزەیی؛ بای هێندە ئاشنایەتیمان هەیە تا هەر شتێک بێتە پێشەوە بە گفتوگۆ چارەسەری بکەین و پشت بە لێدوانی کەسانی تر نەبەستین

لەبارەی لیدوانەکەی جۆن بۆڵتن، راوێژکاری پێشووتری حکومەتی ئەمەریکا لەسەر پەیوەندییەکانی نێوان هەرێم و ئێران، بەرپرسی پەیوەندییەکانی دەرەوەی حکومەتی هەرێمی کوردستان دەڵێ، هەردوولامان بای ئەوەندە “یەکتر دەناسین”، ئەوە جگە لە سەردەمی شا، لە سەردەمی شۆڕشی کۆماری ئیسلامی ئێرانیش تا ئێستا ئەو پەیوەندییە هەیەو بەردەوامە، بۆیە بای هێندە ئاشنایەتیمان هەیە تا هەر شتێک بێتە پێشەوە بە گفتوگۆ چارەسەری بکەین و پشت بە لێدوانی کەسانی تر نەبەستین. پێوەند بەوەی چەندە لەسەر ئاستی دیپلۆماسی لەسەر ئاستی کونسڵخانەو باڵوێزخانەی ئێران لە هەرێم و عێراق، نامەی ناڕەزایەتی گەیەنراوەتە هەرێم، سەفین دزەیی وتی “لیژنەی باڵای هاوبەش لەنێوان هەرێم و ئێران هەیە لە دەرەوەی فەرمانگەی پەیوەندییەکانی حکومەتی هەرێم، کە کار لەسەر ئەو پرسانە دەکات و لە رابردووشدا کاری کردووە، پێوەند بە دیوە دیپلۆماسییەکەش هیچ نامەیەکی ناڕەزایەتی لەلایەن باڵوێزخانەو کونسڵخانەی ئێران نەگەیەنراوەتە فەرمانگەی پەیوەندییەکانی دەرەوەی هەرێم”. زیاتر وتی “ئێمە پەیوەندییەکی دوورو درێژمان لەگەڵ کۆماری ئیسلامی هەیە، لە رابردووشدا ئەو پەیوەندییانە دووچاری  هەورازو نشێو بووە، ئێستاش لەو بروایە دام کە خەڵکانێک هەن پەرۆشی باش بوونی پەیوەندییەکانن، ئێستاش هەوڵ هەیە بۆ چارەسەر تا لەوە زیاتر قسە هەڵ نەگرێت، چونکە هەرێمی کوردستان نیگەرانە لەو زمانەی هەڕەشەیەی لە میدیاکانی ئێران و هەندێ بەرپرسی ئێرانی بەرانبەر بە هەرێمی کوردستان دەیبیستێت، ئەمەش خزمەت بە زمانی گفتوگۆ، دیپلۆماسییەت و عەقڵانیەت ناکات، دەکرێت کێشەکان لە رێگەی گفتوگۆو دیپلۆماسیەتەوە چارەسەریان بۆ بدۆزرێتەوە”.