هێزەکانی یەمەن و هاوپەیمانان بابولمەندەبیان رزگار کرد

964+

پەری ساڵح

پێویست ناکات لەملا بۆ ئەولا بەدوای هەواڵەکانی یەمەنەوە بن، ئەوەی روویدا کورت و پوخت لێرەوە بیزانە:

📌بەرەبەیانی ئەمڕۆ هێزە چەکدارەکانی یەمەن بە پشتیوانیی هاوپەیمانیی عەرەبی دەستپێکردنی ئۆپەراسیۆنێکی سەربازیی بەرفراوانیان بە ناوی “فەجری یەمەن” راگەیاند بۆ بەئامانجگرتنی تواناکانی حوسییەکان.

📌100 فڕۆکەی جەنگی لە هێرشەکاندا بەشدارییان کرد، کە تێیدا 324 ئامانجی گەورەی حوسییەکان تێکشکێنران.

📌دواتر هێزەکانی یەمەن ئۆپەراسیۆنێکی دەوریدانیان لە بەرەی کەناراوەکانی رۆژئاوا ئەنجام دا، و رێگەی سەرەکیی نێوان زووباب و موخایان بڕی و کۆنترۆڵیان کرد.

📌بەردەوام بوون هێرشەکان تا هێزە حکومییەکان کۆنترۆڵکردنی زووباب و فڕۆکەخانەکەیان راگەیاند.

📌دوای گرتنی ناوچەکە، هێزە حکومییەکان سەپاندنی کۆنترۆڵی تەواوی خۆیان بەسەر تەنگەی ستراتیژیی بابولمەندەبدا راگەیاند و داوایان لە چەکدارەکانی حوسی کرد خۆیان بەدەستەوە بدەن، هاوكات راگەیەندرا هەندێک لە چەکدارانی حوسی بە بەلەم لەرێگەی دەریاوە هەڵهاتوون.

📌وەزارەتی بەرگریی سعودیە و وتەبێژی هاوپەیمانیی پاڵپشتیی رایانگەیاند کە چاودێری و پاراستنی ئاسمانی بەردەوام (24 کاتژمێری) بۆ تەنگەی بابولمەندەب و ئامانجەکان دابین دەکەن.

📌ئۆپەراسیۆنەکە فراوانتر بوو؛ لە بەرەی باکووری حەججە (ناوچەی حەرەز) هێرشی بەرفراوان دەستی پێکرد، و لە بەرەی باشووری مائریبیش هێزە حکومییەکان هەردوو ناوچەی “فولەیحە” و “قەرون بوور”یان کۆنترۆڵ کرد.

📌هێزە چەکدارەکانی یەمەن بەفەرمی دەستپێکردنی “هێرشێکی ستراتیژی”یان بۆ سەر سەنعا راگەیاند و ئاماژەیان بەوە کرد کە چەکی پێشکەوتوو و توانای نوێ لەم هێرشەدا بەکاردەهێنن.

📌 ئاژانسە نێودەوڵەتییەکان پشتڕاستیان کردەوە کە ئۆپەراسیۆنەکە بووەتە هێرشێکی هەمەلایەنە لە جەبهەکانی رۆژهەڵات، باکوور و رۆژئاوای یەمەنەوە بەرەو دروستکردنی گوشاری تەواو لەسەر حوسییەکان.