پێنجوێن بە 30 هەزار نەمام سەوزتر دەکرێت

ئەحمەد مستەفا

هەڵمەتی پاییزەی نەمام‌ چاندن لە قەزای پێنجوێن، لە چوارچێوەی پڕۆگرامی پێنجوێن شاری فێربوون دەستی پێ کرد، بە ئامانجی زیادکردنی سەوزایی و جوانکردنی دیمەنی ناوچەکە.

لە کۆبوونەوەیەکی تایبەت کە بە سەرپەرشتی قایمقامی پێنجوێن و بە ئامادەبوونی بەڕێوەبەرایەتی ناحیەی گەرمک، فەرمانگە پەیوەندیدارەکان و لایەنە ژینگەییەکان بەڕێوەچوو، نەخشەڕێگای چاندنی 30 هەزار نەمام دیاریکرا.

بڕیارە نەمامەکان لە سەنتەری پێنجوێن، ناحیەکانی ناڵپارێز و گەرمک، قەراغ شەقامە سەرەکییەکان، پاوان و دارستانەکان بچێنرێن، بەشێک لە نەمامەکانیش بە هاووڵاتیان دەدرێن بۆ بەشداری لە سەوزکردنی دەوروبەری ماڵ و گەڕەکەکانیان.

شەتڵگەکانی سەرچنار لە سلێمانی دابینکردنی سەرجەم نەمامەکانی ئەم پڕۆژەیەی لە ئەستۆ گرتووە و گرووپی نەمام لە گروپێکی دیاری قەزاکە لە بواری ژینگە بەشدارێکی سەرەکی کارەکەیە.