عەلى زەیدى پەیوەندى تەلەفونى بە مەسرور بارزانییەوە کرد

وریا فەتاح

عەلى زەیدى سەرۆک وەزیرانى عێراق، پەوەندییەکى تەلەفونى لەگەڵ مەسرور بارزانى ئەنجامدا و پێى وتووە کە ئەو هێرشانەى دەکرێنە سەر عێراق و هەرێم، قبوڵکراو نین.

لە راگەیەندراوێکدا کە لە پەڕەى خۆى بڵاوى کردووەتەوە، مەسرور بارزانى رایگەیاند: ئەمڕۆ پەیوەندییەکی تەلەفۆنیمان لە عەلی فالح زەیدی سەرۆک وەزیرانی فیدراڵەوە پێگەیشت .

وەک باسى دەکات، سەرۆک وەزیرانی فیدراڵ ، سەرکۆنەی هێرشە درۆنییەکەی سەر نووسینگەی تایبەتی سەرۆک وەزیران و شوێنی حەوانەوەی بەڕێوەبەری ئاژانسی پاراستنی کردووە و وتویەتى،” ئەم هێرشانە بۆ سەر عێراق و هەرێمی کوردستان بە هیچ شێوەیەک قبوڵکراو نین”.

“سوپاسی پەیوەندیی و بەدواداچوونی سەرۆک وەزیرانی فیدراڵمان کرد و جەختمان لە گرنگیی پاراستنی ئاسایش و سەقامگیریی عێراق و هەرێمی کوردستان کردەوە”.