ئۆتۆمبێلێکی گواستنەوەی غاز - وێنە؛ ئەرشیفی 964
یەکێکیان غازی بە گران فرۆشتووە
دوو بریکاری غاز لە هەڵەبجە سزادران
شۆڕش قادری
دوو بریکاری غاز لە هەڵەبجە سزادران، یەکێکیان غازی بە گران فرۆشتووە و ئەوەی دیکەشیان پسوڵەی لە هاوڵاتیان وەرنەگرتووە و کەس نازانێ چۆن بوتڵەکانی دابەش کردووە.
بەپێی راگەیەنراوێکی لیژنەی سوتەمەنی قایمقامیەتی قەزای مەڵبەندی هەڵەبجە، بەهۆی پابەندنەبوونی بە نرخی دیاریکراو و گرانفرۆشی، بریکارێکی دابەشکردنی غاز سزادراوە.
بریکارێکی دیکە بەهۆی پابەندنەبوون بە رێنماییەکانی لیژنەکە و وەرنەگرتنی پسوڵەی غاز لەهاوڵاتیان و ناڕوونی لە چۆنیەتی فرۆشتنی غاز سزا دراوە.
لیژنەی سوتەمەنی قایمقامیەتی قەزای مەڵبەندی هەڵەبجە دەڵێت، نرخی یەک بوتڵ غاز تەنیا و تەنیا بایی هەشت هەزار و 500 دینارە و داوایش لە هاوڵاتیان دەکات، لە کاتی بەدیکردنی هەر سەرپێچییەک لەلایەن بریکارەکانەوە، لیژنەکە ئاگادار بکەنەوە.