بەڕێوەبەرى پەروەردەى سلێمانى رێکاری نوێ بۆ خوێندنی ئۆنلاین رادەگەیەنێت

وریا فەتاح

بەڕێوەبەرایەتی گشتی پەروەردە (سلێمانی)، کۆمەڵێک رێکاری نوێی بۆ بەردەوامبوونی پڕۆسەی خوێندن بە شێوەی ئەلیکترۆنی و ئۆنلاین دەرکرد، کە تێیدا دەستەى کارگێڕى ناوەندەکانى خوێندن و سەرپەرشتیاران دەبێت سێشەممان لە ناوەندەکانى خوێندن ئامادەبن.

بەپێی نووسراوێکی فەرمی کە واژۆی نەژاد عەبدوڵا محەمەد، بەڕێوەبەری گشتی بەوەکالەتی لەسەرە، بڕیاردراوە بە:

1. دەوامی ستافی کارگێڕی:
هەموو رۆژانی سێشەممە، دەستەی کارگێڕی ناوەندەکانی خوێندن و سەرپەرشتیاران دەبێت لە ناوەندەکانی خوێندن ئامادە بن، ئەمەش بە مەبەستی رایکردنی کارە کارگێڕییەکان و هەماهەنگی بۆ پڕۆسەی خوێندنی ئۆنلاین.

2. تۆمارکردنی وانەکان:
بە هەماهەنگی لەگەڵ تەلەفزیۆنی پەروەردەیی، وانەکان بەپێی پێویست تۆمار دەکرێن و بەپێی خشتەیەکی دیاریکراو رۆژانە پەخش دەکرێن.

3. چاودێریکردنی مامۆستایان:
بەڕێوەبەری ناوەندەکانی خوێندن راستەوخۆ سەرپەرشتی کارەکانی مامۆستایان دەکەن لە خوێندنی حکومی و چاودێری ئەرکی ماڵەوەی قوتابیان دەکەن. ئەمەش لە رێگەی پلاتفۆرمی (e-Wane) یان ئەو گرووپانەی لە سۆشیاڵ میدیا بۆ ئەو مەبەستە دروستکراون.

4. ناوەندە پیشەییەکان:
مامۆستایانی ناوەندە پیشەییەکان ڤیدیۆی وانەکانیان تۆمار دەکەن و لە رێگەی گرووپەکانی (واتسئەپ، تێلیگرام و ڤایبەر)ـەوە دەیگەیەننە قوتابیان.

5. فیدباکی هەفتانە:
مامۆستایان پابەند کراون کە بە شێوەی هەفتانە بەڕێوەبەری قوتابخانەکان لە فیدباک و بەرەوپێشچوونی ئاستی خوێندنی قوتابیان ئاگادار بکەنەوە.

ئەم بڕیارانە پەروەردەکانی (رۆژئاوا، ڕۆژهەڵات، شارباژێڕ، شارەزوور، قەرەداغ، سەیدسادق، دوکان، چەمچەماڵ، دەربەندیخان، پێنجوێن) دەگرێتەوە.