"تەنیا زیانی ماددی لێکەوتووەتەوە"
لەناو کێڵگەی نەوتی رومێڵە لە باکوری بەسڕا درۆنێک کەوتەخوارەوە
964+
کاروان ساڵحی – کەرکوک
لەناو کێڵگەی نەوتی رومێڵە لە باکوری بەسڕا درۆنێک کەوتەخوارەوە و تەنیا زیانی ماددی لێکەوەتەوە.
سەرچاوەیەکی تایبەت لە کۆمپانیای BP بە 964ـی وت، ئێوارەی ئەمڕۆ هەینی 6.3.2026 فڕۆکەیەکی بێ فڕۆکەوان لەناو کێڵگەی نەوتی رومێڵە و بەدیاریکراوی لە نزیک شوێنی حەوانەوەی کارمەندانی کۆمپانیاکە کەوتووەتەخوار و رووداوکەش تەنیا زیانی ماددی لێکەوتووەتەوە.
ئاماژەی بەوەشکرد، لە سەرەتای سەرهەڵدانی جەنگی نێوان ئێران و ئیسرائیل و ئەمریکا، ژمارەیەک لە کارمەندانی کۆمپانیا بیانییەکان لەوانەش کۆمپانیای BPـی بەریتانی و کۆمپانیای ENIـی ئیتاڵی شوێنەکانیان جێهێشتووە و گەڕاونەتەوە وڵاتەکانیان.
ئەو سەرچاوەیە راشیگەیاند، گەڕانەوەی ئەو کارمەندانە بۆ وڵاتەکانیان کاریگەری لەسەر بەرهەمی ناوخۆیی نابێت، چونکە بەشی ئەوەندە کارمەند لە کۆمپانیاکان ماون کە گەرەنتی بەردەوامی بەرهەمی ناوخۆیی و کارکردنی بێ پچڕانی پاڵاوگەکان و وێستگەکانی کارەبا دابین بکەن.
پێداچوونەوە؛ شۆڕش قادری
