عێراق رۆژانە 30 ملیۆن لیتر بەرهەم دەهێنێت
وەزارەتی نەوت: بەنزین زۆرە و ترسى قەیرانتان نەبێت
964+
وریا فەتاح
وەزارەتی نەوتی عێراق رەتیدەکاتەوە هیچ قەیرانێکی بەنزین لە ئارادا بێت و دەڵێت، ئەمڕۆ شەممە، داتاکانی مانگی شوبات دەریدەخەن دۆخەکە جێگیرە و کۆگاکان پڕن.
عەبدولساحیب بەزون حەسناوی، وتەبێژی وەزارەتەکە بە ئاژانسی فەرمی عێراقی راگەیاند، دەنگۆی بوونی قەیران راست نییە و ستافەکانیان شەو و رۆژ کار دەکەن.
بەپێی ئامارە فەرمییەکانی وەزارەتی نەوت، دۆخی بەنزین بەمشێوەیەیە:
بەرهەمهێنان: رۆژانە 30 ملیۆن لیتر بەنزین لە ناوخۆدا بەرهەم دەهێنرێت.
کۆگا (خەزن): لە ئێستادا 135 ملیۆن لیتر بەنزینی یەدەگ لە کۆگاکاندا هەیە.
بەکارهێنان: بەهۆی پشووەکان و گەشتکردنەوە، خواست لەسەر بەنزین کەمێک زیادی کردووە بۆ 33.5 ملیۆن لیتر لە رۆژێکدا.
ئاشکراشى کردووە، یەکەی (FCC) لە پاڵاوگەی بەسرە کەوتووەتە کار، ئەمەش 4 ملیۆن لیتر بەنزینی “ئۆکتان بەرز” دەخاتە بازاڕەوە.
