بکوژانی نەوزادی کوورەچی دەستگیر کران

964+

هونەر فارس – گەرمیان

دوای دوو رۆژ لە کوژرانی نەوزادی کوورەچی لە شاری کەلار، پۆلیسی گەرمیان دوو کەسی بە تۆمەتی کوشتنی دەستگیر کرد.

رووداوەکە ئێوارەی رۆژی سێشەممەی رابردوو 7.3.2023، لە ناوچەی پیشەسازیی کەلار روویدا بوو.

لە رووداوەکە کەسێک کوژرا بەناوی نەوزاد ئەحمەد کە تەمەنی 59 ساڵە.

نەوزاد لەناو دوکانەکەی خۆیدا کوژرا و ئەمڕۆ پێنجشەممە 9.3.2023، پۆلیس دوو کەسی بە تۆمەتی کوشتنەکەی دەستگیرکرد.

بەپێی زانیارییەکانی 964، ئەو کەسانەی دەستگیر کراون عەرەبن و تەمەنیان 18 ساڵ و 20 ساڵە.

عەلی جەمال قدوری، وتەبێژی پۆلیسی گەرمیان بە 964ـی راگەیاند: تۆمەتباران دانیان بە تۆمەتەکەیاندا ناوە و لە ئێستادا بەپێی مادەی 406 بەندکراون.

لە ئێستادا بەشی پۆلیسی نەهێشتنی تاوان پەڕاوی لێکۆڵینەوەی لەبارەی چۆنیەتی روودان و هۆکاری تاوانەکەوە کردووەتەوە و لێکۆڵینەوە لەگەڵ تۆمەتباران بەردەوامە.